ÁCh: Reseı men Horvatııa komandalary 4-shi ret kezdespek
ASTANA. QazAqparat. Búgin shırek fınalda Reseı men Horvatııa quramalary kezdesedi. Bul oıyn Reseıdiń Sochı qalasyndaǵy «Fısht» stadıonynda ótedi, dep habarlaıdy QazAqparat tilshisi.
Dop dodasy bastalardan buryn jankúıerler Reseı quramasy toptyq kezeńnen shyǵa ala ma degen saýal tóńireginde pikirtalas jasaǵanyn bilemiz. Olar sońǵy jyldarda burynǵy oıyn órnegin kórsete almaı keledi. FIFA reıtınginde qazir 70-orynda tur. Osynyń ózi quramanyń qanshalyqty deńgeıde quldılaǵanyn kórsetedi. Dop dodasynyń qojaıyny retinde Reseı irikteý kezeńine qatysqan joq. Kóptegen quramamen joldastyq kezdesý ótkizdi. Degenmen olardyń nátıjesine jergilikti jankúıerlerdiń kóńili tola qoımady. Sol sebepti jurttyń kókeıinde olar toptyq kezeńnen árige bara almaıdy degen senbestik oryn aldy. Dop dodasynyń toptyq kezeńinde olar ekinshi oryn aldy. Ýrýgvaıdan jeńilgenimen Egıpet pen Saýd Arabııasynan basym tústi. Jarystyń 1/8 fınaldyq satysynda Ispanııamen joly túıisken orystar bul joly da úmitten góri kúdikke kóbirek boı aldyrdy. Oıynnyń negizgi kezeńinde 1:1 esebimen teń túsken Ispanııa men Reseı jeńimpazdy penaltı arqyly anyqtady. Bul joly Reseıdiń aıy ońynan týdy.
Horvatııa qaı kezde de myqtylyǵyn dáleldep keledi. Qazir FIFA reıtınginde 16-orynda tur. Horvattar irikteý kezeńinde aldyna Islandııany jiberip alyp, ekinshi oryndy qanaǵat tutty. Pleı-off kezeńinde Grekııany óz alańynda 4:1 esebimen jeńip, syrt alańda 0:0 esebimen teń tarqasty. Qos oıynnyń qorytyndysymen fınaldyq kezeńge joldama aldy. Fınaldyq kezeńde D tobynda synǵa túsken horvattar birde-bir upaıdy shashaý shyǵarmastan 9 upaı jınady. Óz tobynda Argentına, Nıgerııa, Islandııany súrindirdi. Jarystyń kelesi satysynda Danııany oıyn sońyndaǵy penaltı tebý arqyly jeńdi. Endi horvattar Reseıdi aınalyp óte ala ma?
Eki qurama budan buryn 3 márte kezdesken. 2008 jylǵy Eýropa birinshiligine irikteý kezeńinde E tobynda sheberlik baıqasqan qos quramanyń eki kezdesýinde 0:0 esebi tirkeldi. Al 2015 jyly Reseıdiń Dondaǵy Rostov qalasynda bolǵan joldastyq kezdesýde horvattar 3:1 esebimen jeńip ketken edi. Endeshe, Reseıge ese qaıtaratyn ýaqyty keldi. Ony oıyn barysynda baǵamdaıtyn bolamyz.
Qazirgi tańda Reseı jankúıerleriniń 56 paıyzdan astamy óz quramasynyń jeńisine senetinin bildirip otyr. Al horvattar ózderiniń quramasy bul kezdesýdiń basty favorıti dep sanaıdy. Árıne, Horvatııa álemdik fýtbolda óte joǵary baǵalana qoımaıtyny belgili. Sondyqtan bul kezdesý asa tartysty ótedi degen senim bar.
Bul tartysty kezdesýde basym túsken qurama búgin ótkiziletin Shvetsııa men Anglııa arasyndaǵy oıyn jeńimpazymen jartylaı fınalda jup quraıdy. Ol báseke 11 shilde kúni Máskeýdiń «Lýjnıkı» stadıonynda ótedi. Oıyndy saǵat 00.00-de «Qazaqstan» jáne «Qazsport» telearnalary tikeleı efırden kórsetedi.
Sondaı-aq, keshe shırek fınal oıyndarynda Frantsııa Ýrýgvaıdy 2:0, Belgııa Ýrýgvaıdy 2:1 esebimen jeńdi.
