ÁCh bıletiniń baǵasy 33 000 dollarǵa jetti: Meksıka prezıdenti FIFA-ny synǵa aldy
ASTANA. KAZINFORM — 2026 jylǵy álem chempıonaty bıletteriniń baǵasy 32 970 AQSh dollarǵa jetip, al qaıta satý naryǵynda 2,3 mıllıon dollarǵa deıin kóterilgen. Baǵanyń kúrt qymbattaýyna baılanysty Meksıka prezıdenti Klaýdııa Sheınbaým FIFA uıymyn baǵa saıasatyn qaıta qaraýǵa jáne týrnırdi jankúıerler úshin qoljetimdi etýge shaqyrdy. Bul týraly AP agenttigi jazdy.
Sheınbaýmnyń aıtýynsha, mundaı baǵadan keıin kóp jankúıer týrnırdi tamashalaı almaıdy.
— Fýtbol basqasha bolý kerek. Bul FIFA ishinde de oılanatyn jaǵdaı, — dedi ol.
Onyń pikirinshe, oıyn barshaǵa qoljetimdi bolyp, álemdegi adamdardy biriktirýi tıis.
2026 jylǵy álem chempıonatynyń AQSh, Kanada jáne Meksıkada ótetin matchtaryna bıletterdiń bastapqy baǵasy 140 dollardan 8 680 dollarǵa deıin bolǵan. Keıin keıbir bıletter arzandaǵanymen, jekelegen oıyndarda baǵa aıtarlyqtaı ósken.
Eń qymbat bıletter fınalǵa tıesili bolyp, olardyń quny 32 970 dollarǵa deıin jetken. Al qaıta satý naryǵynda baǵa odan da joǵarylap, sáýir aıynda FIFA-nyń qaıta satý platformasynda keıbir bıletter shamamen 2,3 mıllıon dollarǵa deıin baǵalanǵan.
Sheınbaým kommertsııalyq modeldiń sporttaǵy qalypty tájirıbe ekenin moıyndady. Degenmen ol sport tek iri shyǵyndarǵa negizdelgen keńistikke aınalmaýy kerek ekenin atap ótti.
FIFA ázirge Meksıkanyń bul málimdemesine jaýap bergen joq. Uıym prezıdenti Djannı Infantıno bılet baǵasy Soltústik Amerıka naryǵyna sáıkes ekenin aıtqan.
Eske sala keteıik, byltyr jyl sońynda Football Supporters Europe halyqaralyq jankúıerler qaýymdastyǵynyń esepteýine sáıkes, AQSh-taǵy matchtardyń baǵasy Qatarda 2022 jyly ótken álem chempıonaty matchtarymen salystyrǵanda 5 ese óskeni týraly aıtylǵan edi.
https://kaz.inform.kz/news/2026-zhilgi-ach-matchtarina-bilet-bagasi-belgl-boldi-futbol-zhankuyerler-ashuli-939fb5
