ÁCh-2026: Japonııa men Nıderland jeńimpazdy anyqtaı almady
ASTANA. KAZINFORM – 2026 jylǵy fýtboldan álem chempıonatynyń toptyq kezeńindegi alǵashqy týrda Nıderland men Japonııa quramalary 2:2 esebimen teń tústi, dep habarlaıdy FIFA-nyń resmı saıty.
F tobynyń kezdesýi AQSh-tyń Dallas qalasyndaǵy stadıonda ótti. Esep ekinshi taımda ashyldy. 50-mınýtta nıderlandtyq qorǵaýshy Vırdjıl van Deık Raıan Gravenberhtiń pasynan keıin baspen dál soqqy jasap, komandasyn alǵa shyǵardy.
Japonııalyqtar kóp kúttirmeı tarazy basyn teńestirdi. Jeti mınýttan keıin Keıto Nakamýra tómen baǵyttalǵan dál soqqymen dopty Bart Verbrıýggen qorǵaǵan qaqpaǵa kirgizdi.
64-mınýtta Krısensıo Sammervıll Nıderland quramasyn qaıtadan alǵa shyǵardy. Qaptaldaǵy oıynshy aıyp alańynyń ortasyna qaraı oıysyp, nysanaǵa dál kózdedi. Onyń tepken doby baǵanǵa tıip qaqpaǵa enip ketti.
Oıyn sońyna deıin Ronald Kýman jattyqtyratyn komanda jeńisti saqtap qalatyndaı kóringen. Alaıda matchtyń aıaqtalýyna az ýaqyt qalǵanda japonııalyqtar esepti teńestirip úlgerdi.
Buryshtamadan keıin Kokı Ogava áýedegi tartysta basym túsip, al Daıchı Kamada 89-mınýtta dopty qaqpaǵa baǵyttap, matchtyń qorytyndy esebin belgiledi – 2:2.
Birinshi taımda Japonııa quramasynyń qaqpashysy Zıon Sýzýkı birneshe ret komandasyn qutqaryp qaldy. Ol Donıell Malen men Kodı Gakponiń qaýipti soqqylaryn qaıtardy.
Óz kezeginde japonııalyqtar da qarsylas qaqpasy mańynda qaýipti sátter uıymdastyrdy. Olardyń qatarynda Keıto Nakamýra men Aıase Ýeda boldy.
Buǵan deıin Brazılııa men Morokkonyń bir-birin jeńe almaǵanyn jazdyq.
