ÁCh-2026: Ispanııa jartylaı fınaldyń ekinshi joldamasyna ıe boldy
ASTANA. KAZINFORM — Fýtboldan 2026 jylǵy álem chempıonaty ¼ fınalynda Ispanııa — Belgııa kezdesýiniń nátıjesi belgili boldy.
Jankúıerler dop dodasy bastalardan buryn qos quramany bas báıgege úmitti úzdikter qataryna qosqan edi. Olardyń sapynda álemge tanymal fýtbolshylar sany basym. Sondyqtan olar qaı kezde de júldeli oryndarǵa qol sozýdy qalaıdy.
2010 jylǵy álem chempıony Ispanııa quramasy alǵashqy mınýttan tizgindi óz qolynda ustaýǵa tyrysty. Bul sátte belgııalyq fýtbolshylar negizinen qorǵanysqa kóńil bóldi. Nátıjesinde 30-mınýtta ıspanııalyq Fabıan Rýıs óz múmkindigin múlt jibergen joq. Ol Tıbo Kýrtýa qorǵaǵan Belgııa qaqpasynan sańylaý taýyp, óz quramasyn alǵa shyǵardy. Degenmen kóp uzamaı qaıtadan tarazy basy teńesti. Bul joly 41-mınýtta belgııalyq Sharl De Ketelareniń qanjyǵasy maılandy.
Oıynnyń 88-mınýtynda ıspanııalyq Mıkel Merıno soqqan gol kezdesý taǵdyryn sheshti.
Osylaısha Ispanııa qarsylasynan 2:1 esebimen basym tústi.
Endi jeńimpaz qurama 15 shildede jartylaı fınalda Frantsııamen jasyl alańǵa shyǵady.
Ispanııa H tobynda eki jeńis, bir teń oıynmen 7 upaı jınady. Olar Ýrýgvaıdy 1:0, Saýd Arabııasyn 4:0 esebimen jeńip, Kabo-Verdemen 0:0 esebimen teń tústi. Odan keıin 1/16 fınalda Aýstrııany 3:0, 1/8 fınalda Portýgalııany 1:0 esebimen qapy qaldyrdy.
Belgııalyq fýtbolshylar G tobynda bir jeńis, eki teń oıynmen 5 upaı jınap, birinshi orynǵa taban tiredi. Olar Egıpetpen 0:0, Iranmen 1:1 esebimen teń tússe, Jańa Zelandııany 5:1 esebimen basym tústi. Pleı-off satysynda Senegaldy qosymsha kezeńde 3:2 esebimen jeńse, 1/8 fınalda AQSh-ty 4:1 esebimen tize búktirdi.
Eki qurama qazirge deıin 13 márte kezdesken edi. Onyń ishinde 7-eýi Ispanııa, 3-eýi Belgııanyń basymdyǵymen aıaqtalsa, qalǵanynda qarsylastar teń nátıjege qanaǵat bildirdi.
Aıta ketsek, budan buryn ¼ fınalda Frantsııa Marokkony 2:0 esebimen jeńip, jartylaı fınal joldamasyna ıe boldy.
Sondaı-aq ¼ fınalda Norvegııa — Anglııa, Argentına — Shveıtsarııa sheberlik baıqasady.
