ÁCh-2026-ǵa qatyspaıtyn TOP-5 juldyz: álem fýtbolynyń úzdikterin Qazaqstanmen ne baılanystyrady
ASTANA. KAZINFORM – 2026 jylǵy fýtboldan álem chempıonatyna álemdegi 200-den astam ulttyq quramanyń ishinen irikteýden ótken 48 komanda qatysady. Alaıda keıbir fýtbol juldyzdary óz quramalary joldama alǵanyna qaramastan aldaǵy dodada óner kórsetpeıdi. Onyń sebepteri týraly Kazinform agenttiginiń tilshisi sholý jasady.
2026 jylǵy álem chempıonatynda kem degende 30 tanymal fýtbolshy óner kórsetpeıdi degen esep bar. Biz olardyń ishinen Qazaqstanǵa kem degende bir ret kelgen nemese qazaqstandyq klýbtarmen ne ulttyq quramamen kezdesken bes oıynshyǵa toqtalamyz.
Edýardo Kamavınga (Frantsııa)
2025 jyldyń kúzinde madrıdtik «Real» Chempıondar lıgasy aıasynda Almatyda «Qaıratqa» qarsy oınady. Kamavınga klýbymen birge Qazaqstanǵa kelip, ıspanııalyq komanda Ortalyq stadıonda 5:0 esebimen jeńiske jetti. Sol matchta gol soqqan oıynshylardyń biri dál osy frantsýz jartylaı qorǵaýshysy boldy.
2026 jyly Frantsııa quramasynyń bas bapkeri Dıde Desham Kamavıngany álem chempıonatyna arnalǵan túpkilikti quramǵa engizgen joq. Desham bul sheshimdi jartylaı qorǵanystaǵy joǵary básekelestikpen jáne jaraqattarǵa baılanysty Edýardo úshin sátsiz ótken maýsymmen túsindirdi.
23 jastaǵy fýtbolshy týrnırge barýdyń ornyna AQSh-qa attandy. Ol jýyrda, 2026 jyldyń maýsym aıynyń basynda, Garvard bıznes mektebindegi (Harvard Business School) qysqamerzimdi bıznes kýrsyn sátti aıaqtap, áleýmettik jelidegi paraqshasynda sertıfıkatyn kórsetti.
Rodrıgo (Brazılııa)
Brazılııalyq shabýylshy Rodrıgo da madrıdtik «Realdyń» sapynda Almatyǵa kelip, «Qaıratqa» qarsy oınaǵan bolatyn.
Ol da álem chempıonatyna qatyspaıdy. Sebebi bıyl naýryz aıynda «Hetafege» qarsy matchta aýyr jaraqat alyp, tizesiniń aldyńǵy aıqas baılamy men shemirshek tinin zaqymdaǵan. Qazir fýtbolshy uzaq merzimdi ońaltý kezeńinen ótip jatyr jáne maýsymnyń qalǵan bóligin ótkizip alady.
Dárigerlerdiń boljamynsha, Rodrıgo alańǵa 2027 jyldyń basynan erte oralmaıdy.
Robert Levandovskı (Polsha)
37 jastaǵy Robert Levandovskıdiń álem chempıonatyna qatyspaý sebebi basqasha. Onyń otany Polsha quramasy jarysqa joldama ala almady.
Levandovskı Qazaqstan quramasyna qarsy birneshe ret oınap, elimizge de kelgen. 2018 jylǵy álem chempıonatynyń irikteý kezeńinde Polsha quramasy Qazaqstanǵa saparlaǵan bolatyn. 2016 jylǵy 4 qyrkúıekte Astanadaǵy «Astana Arenada» ótken match 2:2 esebimen aıaqtaldy.
Levandovskı tolyq match ótkizip, penaltıden gol soqty jáne sary qaǵaz aldy. Sol irikteýdegi qarymta kezdesý Varshavadaǵy «Narodovy» stadıonynda ótti. Polsha 3:0 esebimen jeńiske jetip, Levandovskı taǵy bir goldyń avtory atandy.
Aıta keteıik, osydan úsh apta buryn, 2026 jyldyń mamyr aıynda, ol «Barselonadan» ketetinin resmı túrde jarııalady. Polsha shabýylshysy «Kamp Noýda» «Betıske» qarsy matchtan keıin jankúıerlermen qoshtasyp, Katalonııadaǵy mıssııasyn oryndaǵanyn aıtty.
Benıamın Sheshko (Slovenııa)
Slovenııalyq shabýylshy Benıamın Sheshko aǵylshynnyń «Manchester ıÝnaıted» klýbynda oınaıdy. Biraq ol da álem chempıonatyna qatyspaıdy, óıtkeni Slovenııa quramasy irikteýden óte almady.
2024 jylǵy 13 qazanda Ulttar lıgasy aıasynda Slovenııa quramasy Almatyǵa keldi. Sheshko kapıtandyq tańǵyshpen negizgi quramda alańǵa shyǵyp, matchtyń tolyq 90 mınýtyn ótkizdi. Sol kezdesýde slovenııalyqtar ıAn Mlakardyń golynyń arqasynda 1:0 esebimen jeńiske jetti.
Al Almatyǵa kelýden bir aı buryn Sheshko Qazaqstanǵa qarsy eń jarqyn matchtarynyń birin ótkizdi. Ulttar lıgasynyń óz alańyndaǵy oıynynda ol het-trık jasap, 23, 28 jáne 63-mınýttarda gol soǵyp, Slovenııaǵa 3:0 esebimen senimdi jeńis syılady.
Forvard Qazaqstanǵa qarsy Eýropa chempıonatynyń irikteý kezeńinde de oınady. 2023 jylǵy naýryzda Astanada ótken kezdesýde qosalqy quramda qalyp, Slovenııa 2:1 esebimen jeńiske jetti. Al sol jyldyń qarashasynda Lıýblıanada ótken qarymta matchta negizgi quramda shyǵyp, penaltıden gol soqty. Kezdesý 2:1 esebimen slovenııalyqtardyń paıdasyna aıaqtalyp, Qazaqstandy Eýroǵa tikeleı joldamadan aıyrǵan bolatyn.
Federıko Dımarko (Italııa)
28 jastaǵy Federıko Dımarko álemdegi eń úzdik sol qaptal qorǵaýshylarynyń biri sanalady.
2025/2026 jylǵy maýsym qorytyndysy boıynsha ol A serııasynyń eń úzdik oıynshysy (MVP) atandy. Bul – Italııa chempıonaty tarıhyndaǵy erekshe oqıǵa, óıtkeni atalǵan marapat alǵash ret qorǵaýshyǵa berildi.
Dımarko óz pozıtsııasy úshin tańǵalarlyq nátıje kórsetip, maýsym ishinde qorǵaýshylar arasyndaǵy goldyq pas sany boıynsha lıga rekordyn qaıtalady nemese keı derekter boıynsha jańartty. Onyń enshisinde chempıonatta 16 nátıjeli pas jáne 6-7 gol bar.
2025 jyldyń kúzinde Dımarko «Inter» sapynda Mılanda almatylyq «Qaıratqa» qarsy oınady. Italııanyń áıgili klýby qazaqstandyq komandany 2:1 esebimen jeńdi.
Alaıda Dımarko da álem chempıonatynda óner kórsetpeıdi. Sebebi Italııa quramasy 2026 jylǵy chempıonatqa joldama ala almady.
Aıta keteıik, buǵan deıin álem chempıonaty qarsańynda qatysýshy elder quramalarynda bolyp jatqan ózgerister týraly jazǵan edik.
