ÁCh-2026: Fýtboldaǵy rekordtyq álem chempıonaty týraly basty derekter
ASTANA. KAZINFORM – 11 maýsymda fýtboldan álem chempıonaty bastalady. Bul – FIFA-nyń uıymdastyrýymen ótetin tarıhtaǵy eń aýqymdy týrnır. Bıyl alǵash ret álem chempıony ataǵy úshin 48 ulttyq qurama talasady, al matchtar birden úsh elde – AQSh, Kanada jáne Meksıkada ótedi, dep habarlaıdy BBC agenttigi.
Álem chempıonatynyń fınaldyq kezeńi bir aıdan astam ýaqytqa sozylady. Týrnır jeńimpazy 19 shilde kúni Ister-Raterford qalasyndaǵy MetLife stadıonynda anyqtalady.
Bıylǵy doda birneshe kórsetkish boıynsha rekord jańartpaq. Eger 1930 jyly ótken alǵashqy álem chempıonatyna 13 qurama qatysqan bolsa, qazir olardyń sany 48-ge jetti. Matchtar sany da tarıhı maksımýmǵa jetip, jankúıerlerdi jalpy 104 oıyn kútip tur.
Týrnırdiń basty jańalyqtarynyń biri – jarys formatynyń ózgerýi. Toptyq kezeńde 48 qurama tórt komandadan quralǵan 12 topqa bólinedi. Pleı-off kezeńine ár toptan birinshi jáne ekinshi oryn alǵan komandalar, sondaı-aq úshinshi oryn ıelengen quramalardyń ishindegi úzdik segizi joldama alady.
Osylaısha, jarystyń sheshýshi kezeńi 1/16 fınaldan bastalady.
Mamandardyń pikirinshe, jańa júıe týrnırdiń alǵashqy kezeńderinde iri sensatsııalardyń bolý yqtımaldyǵyn aıtarlyqtaı tómendetedi. Endi favorıtterdiń toptan shyǵýy jeńildeı túsedi, al olardyń sátsizdigi úlken kútpegen jaǵdaı retinde baǵalanbaq.
Álem chempıonatynyń matchtary úsh eldegi 16 stadıonda ótedi. AQSh týrnır oıyndarynyń basym bóligin qabyldap, kezdesýler Nıý-Iork, Los-Andjeles, Maıamı, Dallas jáne Atlanta qalalaryndaǵy 11 arenada uıymdastyrylady.
Meksıkada matchtar Mehıkodaǵy áıgili «Atsteka» stadıonynda, sondaı-aq Gvadalahara men Monterreı qalalarynda ótedi. Kanada óz tarıhynda alǵash ret álem chempıonatyn qabyldap, oıyndardy Toronto men Vankýverdegi stadıondarda ótkizedi.
Býkmekerlerdiń baǵalaýynsha, álem chempıony atanýǵa basty úmitkerler qatarynda qazirgi chempıon Argentına quramasy, sondaı-aq Frantsııa, Ispanııa, Anglııa jáne Brazılııa bar.
Al mamandar tosyn syı jasaýy múmkin komandalardyń qataryna Erlıng Holand oınaıtyn Norvegııany, Marokkony, Senegaldy jáne álem chempıonatyna alǵash ret qatysatyn Ózbekstan quramasyn qosyp otyr.
Bıylǵy álem chempıonaty fýtbol juldyzdarynyń tutas bir býyny úshin sońǵy mýndıal bolýy múmkin. Týrnırde Lıonel Messı, Krıshtıaný Ronaldý, Lýka Modrıch, Manýel Noıer jáne Kevın de Breıne óner kórsetedi. Bul doda olardyń mansabyndaǵy sońǵy álem chempıonaty bolýy yqtımal.
Buǵan deıin FIFA-nyń osy jylǵy álem chempıonaty qarsańynda Qazaqstan quramasyna qatysty qandaı sheshim qabyldaǵany belgili bolǵan edi.
Aıta keteıik, AQSh-taǵy fýtboldan álem chempıonatynda qonaqúıler men bıletter qansha turatynyn myna jerden oqı alasyz.
Sondaı-aq FIFA stadıonǵa sý ishetin bótelkelerdi alyp kirýge tyıym saldy.
