ÁCh-2026: Frantsııa Shvetsııany oısyrata jeńip, chempıonattyń 1/8 fınalyna shyqty
ASTANA. KAZINFORM – Frantsııa quramasy fýtboldan 2026 jylǵy álem chempıonatynyń 1/16 fınalynda Shvetsııany 3:0 esebimen jeńip, kelesi kezeńge joldama aldy, dep habarlaıdy FIFA.
Kezdesý AQSh-tyń Nıý-Iork–Nıý-Djersı stadıonynda ótti. Frantsýz quramasy match boıy basymdyq tanytyp, úsh jaýapsyz gol soqty.
Esep birinshi taımnyń aıaqtalýyna az ýaqyt qalǵanda ashyldy. Kılıan Mbappe 45+1-mınýtta qarsylas qaqpasyn dál kózdep, Frantsııany alǵa shyǵardy.
Ekinshi taımda Dıde Desham shákirtteri basymdyǵyn eseleı tústi. 53-mınýtta Bredlı Barkola Maıkl Olızeniń nátıjeli pasynan keıin esepti 2:0-ge jetkizdi. Al 74-mınýtta Mbappe dýbl avtory atanyp, matchtyń qorytyndy nátıjesin belgiledi – 3:0.
Osylaısha Frantsııa quramasy álem chempıonatynyń 1/8 fınalyna shyqty. Kelesi kezeńde olar Germanııany penaltı serııasynda jeńgen Paragvaı quramasymen kezdesedi.
Associated Press málimetinshe, Mbappe bul oıynda álem chempıonattaryndaǵy 17 jáne 18-goldaryn soǵyp, týrnır tarıhyndaǵy úzdik surmergender tiziminde Lıonel Messıden bir gol ǵana qalyp keledi. Sonymen qatar ol bıylǵy álem chempıonatyndaǵy «Altyn býtsa» básekesinde de Messımen teńesti.
Aıta keteıik, buǵan deıin Paragvaı quramasy 1/16 fınalda Germanııany penaltı serııasynda jeńip, sensatsııalyq nátıjege qol jetkizgeni habarlandy.
Sondaı-aq Erlıng Holandtyń goly Norvegııany 1/8 fınalǵa alyp shyqty.
