ÁCh-2026: Frantsııa Irak quramasyn oısyrata jeńip, pleı-off kezeńine shyqty
ASTANA. KAZINFORM – Frantsııa quramasy 2026 jylǵy fýtboldan álem chempıonaty toptyq kezeńiniń ekinshi týrynda Irakty iri eseppen jeńdi, dep habarlaıdy Sports.kz.
Fıladelfııada ótken kezdesý frantsýzdardyń 3:0 esebimen jeńisimen aıaqtaldy.
Esep 14-mınýtta ashyldy. Kılıan Mbappe aıyp alańynyń aldynda dopty qabyldap, sol aıaǵyna yńǵaılap, alystan jasaǵan keremet soqqysymen dopty qaqpanyń joǵarǵy buryshyna dál baǵyttady.
Ekinshi taımda uzaq úzilisten keıin frantsýzdar 54-mınýtta esep aıyrmasyn eseleı tústi. Irak quramasynyń qaqpashysy men qorǵaýshysy óz qaqpasy mańynda dopty shyǵarmaq bolǵan sátte Ýsman Dembele pasty qaǵyp alyp, Mbappeni bos qaqpaǵa qaraı shyǵardy. Sóıtip, Frantsııa quramasynyń kapıtany dýbl avtory atandy.
Kezdesýdiń qorytyndy esebi 66-mınýtta tirkeldi. Frantsýzdar joǵary qysym uıymdastyryp, qarsylas alańynyń jartysynda dopty tartyp aldy. Odan keıin Maıkl Olıse aıyp alańyna Ýsman Dembelege pas shyǵardy, al shabýylshy dál soqqymen esepti 3:0-ge jetkizdi.
Bul dýbl Mbappe úshin tarıhı kórsetkish boldy. Shabýylshy álem chempıonattaryndaǵy goldarynyń sanyn 16-ǵa jetkizip, týrnır tarıhyndaǵy úzdik surmergender tiziminde ańyzǵa aınalǵan Mıroslav Klozemen teńesti.
Olardyń aldynda tek 18 golmen Lıonel Messı ǵana tur.
Eki týrdan keıin Frantsııa quramasy alty upaı jınap, merziminen buryn pleı-off kezeńine joldama aldy.
I toptaǵy sońǵy matchta frantsýzdar 27 maýsym kúni Astana ýaqytymen saǵat 00:00-de Norvegııamen kezdesedi. Dál osy ýaqytta Senegal men Irak quramalary da ózara oınaıdy.
Eske sala ketsek, buǵan deıin Messı álem chempıonattary tarıhyndaǵy eń úzdik surmergen atanǵanyn jazdyq.
