ÁCh-2026: Erlıng Holand Brazılııamen kezdesýde Norvegııaǵa sensatsııalyq jeńis syılady
ASTANA. KAZINFORM — Fýtboldan 2026 jylǵy álem chempıonatynda 1/8 fınalynda Brazılııa — Norvegııa kezdesýi aıaqtaldy.
Bul oıynǵa jankúıerler tarapynan erekshe qyzyǵýshylyq bolǵany ras. Álemniń úzdik quramalary qatarynda sanalatyn Brazılııaǵa Erlıng Holand bastaǵan norvegııalyq fýtbolshylar qandaı qaýqar kórsete alady? Bul saýal kóptiń kókeıinde júrgeni ras.
Oıynǵa brazılııalyq qurama sapynan alǵan jaraqatyna baılanysty qorǵaýshy Ýeslı, jartylaı qorǵaýshy Lýkas Paketa, shabýylshy Rafınıa qatysqan joq. Eýropalyq quramadan barlyq fýtbolshy aldaǵy kezdesýge saqadaı saı boldy.
Kezdesý barysynda alǵashqy mınýttan tizgindi óz qolynda ustaýǵa tyrysqan Brazılııa quramasy tolassyz shabýyl uıymdastyrdy. Oǵan norvegııalyq oıynshylar laıyqty tótep berip jatty. Soǵan qaramastan birinshi kezeńde tablodaǵy esepke ózgeris engen joq.
Ekinshi kezeńde de Ońtústik Amerıka qurlyǵynyń ókilderi basymdyqty arttyra tústi. Dese de norvegııalyq fýtbolshylar qarymta shabýylǵa kóńil bóldi. Erlıng Holand 79-mınýtta esep ashsa, 90-mınýtta taǵy bir márte kózge tústi. Nátıjesinde ol bıylǵy álem birinshiliginde bes gol soǵyp úlgerdi.
Al 99-mınýtta Neımar penaltıden esep aıyrmasyn qysqartty.
Osylaısha Norvegııa quramasy Brazılııany 2:1 esebimen jeńip, ¼ fınalǵa joldama aldy.
Aıta ketsek, qazirge deıin eki qurama eki márte kezdesken edi. Onyń bireýinde Norvegııa basym tússe, bir oıyn teń nátıjemen aıaqtaldy.
Aıta ketsek, budan buryn 1/8 fınalda Frantsııa Paragvaıdy 1:0, Marokko Kanadany 3:0 esebimen jeńip, ¼ fınalǵa joldama aldy.
Endi 05:00–de Meksıka — Anglııa quramalary jasyl alańǵa shyǵady.
Al 7 shildede 00:00–de Portýgalııa — Ispanııa, 05:00–de AQSh — Belgııa, 21: 00-de Argentına — Mysyr, 8 shildede 01:00–de Shveıtsarııa — Kolýmbııa sheberlik baıqasady.
Eske salsaq, budan buryn Marokko quramasy Kanadany jeńip, shırek fınalǵa joldama aldy.
