ÁCh-2018: V tobynda kósh bastaǵan Iran búgin Ispanııamen oınaıdy
ASTANA. QazAqparat - Búgin fýtboldan 2018 jylǵy Álem chempıonaty toptyq kezeńiniń 2-týr oıyndary jalǵasyp, V tobynyń ókilderi Iran jáne Ispanııa quramalary kezekti úsh upaıdy sarapqa salady, dep habarlaıdy QazAqparat tilshisi.
Alǵashqy týrdan soń, Marokkony jeńgen Iran osy topta kósh bastap tur. Sol oıynda Afrıka qurlyǵynyń ókilderi aıqyn basymdyqqa ıe bolǵanmen, sońǵy mınýttarda óz qaqpasyna gol soǵyp alyp, jeńiliske ushyraǵan bolatyn. Sondaı-aq, Ispanııa men Portýgalııanyń teń túsýi chempıonat aldynda V tobynyń aýtsaıderi sanalǵan Irandy lıderge aınaldyrdy. Endi parsylar tarıhı jetistikke qol jetkizý úshin toptaǵy qalǵan eki oıynnyń birin utsa jetip jatyr. Árıne, Pıreneıdiń qos ókili sońǵy jyldary álem fýtbolynyń bıigine shyqqan, degenmen Reseıde ótip jatqan mýndıalda eshbir komandany aýtsaıder nemese favorıt dep ataýǵa bolmaıtynyn 1-týr oıyndary dáleldedi. Onyń ústine, qazir ırandyqtar sporttyq babyna shyqqan, bapkeri de pıreneılikterge qarsy oınaý boıynsha tájirıbesi mol maman - Karlýsh Keırýsh. Parsy oıynshylary, atap aıtqanda «Nottıngem Forresten» shaqyrylǵan Ashkan Dejaga áleýmettik jelide ózderine senimdi ekenin aıtyp, «búgin keshkisin tarıhı jeńiske jetemiz» dep jankúıerlerine ýáde berip otyr.
Tonight we can make history! Emshab to dasteh mah haz! Bareh keshvare azizemon, Hamegi baham Iran! 🙏🏽🇮🇷 pic.twitter.com/BBVhrw3PKE
— ashkan dejagah (@Ashkan_Dejagah) 20 ııýnıa 2018 g.
Aldaǵy oıynda Iran negizinen qorǵanýmen bolatyny aıtpasa da túsinikti. Iran quramasynyń 2018 jylǵy Álem chempıonatyndaǵy resmı tilshisi Sııavash Rahmanıdiń aıtýynsha, ortalyq qorǵaýshy Rýzbeh Cheshmıdiń jaraqat alýy sońǵy kúnderi parsy baspasózinde eń kóp talqylanǵan taqyryptardyń biri boldy. Onyń ornyna alańǵa shyǵýy múmkin basty úmitkerler retinde «Estehloldyń» 34 jastaǵy qorǵaýshysy Pedjmon Móntázárı men jas oıynshy Májıd Huseınıdiń esimi aıtylyp júr.
Irandyqtardyń jubanyshyna oraı, dıskvalıfıkatsııa merzimi aıaqtalǵan jartylaı qorǵaýshy Saııid Ezatollahı de qorǵanysqa kómekshi retinde alańǵa shyǵarylýy múmkin.
Ispanııada quram jaǵynan eshqandaı kemshilik ne kedergi joq. Fernando Ierro shákirtteri osy chempıonattaǵy ázirge eń tamasha oıyn kórsetken komanda bolyp otyr. Portýgalııaǵa qarsy ótken oıynda teń nátıje tirkelgenmen, Ispanııa sheber oıyn órnegin kórsetti. Mamandardyń aıtýynsha, sol oıynda teń nátıje tirkelýine eki nárse sebepshi boldy. Birinshisi - AS basylymynyń kolýmnısi Alfredo Relanonyń aıtýynsha, Krıshtıaný Ronaldýdyń «ǵylymı dáldikpen» soqqan goldary, ekinshisi - The Guardian jýrnalynyń fýtbol sarapshysy Pol Makınnes aıtqan «Ronaldýdyń tabıǵat zańyna baǵynbaǵan jyldamdyǵy».
Biraq Irannyń mundaı fýtbolshysy joq. Komandalar deńgeıiniń osy alshaqtyǵyn eskere otyryp, býkmekerlik keńseler Irannyń jeńisine ortasha 20 koeffıtsıent berip otyr. Al nátıje qalaı bolatynyn búgin, Astana ýaqyty boıynsha, túngi 00:00-den bastap Qazsport telearnasynyń tikeleı efırinen tamashalaı alasyzdar. Oıyn Tatarstan astanasyndaǵy «Qazan Arena» stadıonynda ótedi.
Chempıonat matchtarynyń tolyq kestesin myna jerden kórýge bolady.
