ÁCh-2018: Ýrýgvaı Saýd Arabııasyn nege jeńe almaı júr
ASTANA. QazAqparat - Fýtboldan álem birinshiliginde A tobyndaǵy Ýrýgvaı men Saýd Arabııasy quramalary arasyndaǵy kezdesý búgin Dondaǵy Rostov qalasynda «Rostov-arena» stadıonynda ótedi. Ońtústik Amerıka qurlyǵynyń ókilderi arab jigitterin jeńe almaı keledi, dep habarlaıdy QazAqparat tilshisi.
Árıne, jeńiske jetý jóninen Ýrýgaıdyń úmiti zor. Quramada kóptegen sheberligi shyńdalǵan jigitter bar. Árbir qarsylasyn yqtyryp, atoılap shyǵa keledi. Budan burynǵy dop dodalarynda jankúıer kóńilinen shyǵatyn oıyndar kórsetken edi. Sol izben bıyl da tabysqa qol jetkizemiz degen oıda júr. Tájirıbeli fýtbolshylar joq emes. Solardyń biri - Ispanııanyń «Atletıko» (Madrıd) komandasynda oınaıtyn Dıego Godındi aıtýǵa bolady. Ol - Ýrýgvaı quramasy qorǵanysynda tasqamal oıynshy. Ispanııanyń «Barselona» klýbynyń shabýylshysy Lýıs Sýaresti kim bilmeıdi? Frantsııanyń PSJ komandasyn órge súırep júrgen Edıson Kavanı de árbir kezdesýde qanjyǵasyn maılaǵandy qolaıly kóredi.
Saýd Arabııasy quramynda mundaı jampozdar sanaýly. Ispanııanyń «Vılıarreal» klýbynyń jartylaı qorǵaýshysy Salem Ál-Dosarı men sol eldiń «Levantesinde» dop tebetin Fahad Ál-Mývalladtan basqasynyń barlyǵy óz eliniń ishki birinshiliginde oınaıdy. Ol eldegi dop dodasynyń deńgeıi joǵary emes ekeni taǵy belgili. Endeshe, bul quramanyń alar asýy, shyǵatyn taýy bıik bola qoımaıdy. Mamandar da solaı boljam jasap otyr. Olardyń Reseımen kezdesýinde sol olqylyqtar kózge uryp turdy. Arabtar jankúıer kóńilinen shyǵatyn oıyn órnegin kórsete almady. Sonyń saldarynan óz qaqpasynan jaýapsyz bes dop alyp shyqqanyn bárimiz bilemiz.
Saýd Arabııasy quramasynyń bas bapkeri Hýan Antonıo Pıtstsı bul pikirmen kelispeıdi. Ol óz shákirtteriniń eshbir kezdesýinde qarsylasynyń yǵyna jyǵyla qoımaıtynyn aıtady. «Biz árbir oıynǵa tyńǵylyqty daıyndalamyz. Qarsylas jóninde barlyq aqparatty jınaqtaımyz. Bizdiń bul álem birinshiligindegi tusaýkeser oıynymyz óte qıyn boldy. Bizdiń quramada da jyldam jigitter bar. Biz tartysty oıyn kórsetemiz», - dedi ol.
Ýrýgvaılyq bapker Oskar Tabares te atalmysh kezdesý jaıynda pikirin bildirdi. «Biz Ýrýgvaıdy álemdik fýtbol kartasyna qaıta alyp keldik. Syrt kóz bizdi álsiz topqa tústi dep aıtady. Degenmen bizge qarsylas quramalardyń barlyǵy úsh upaıdy ońaı beretinder qataryna qosylmaıdy», - dedi O.Tabares.
Qos qurama óz tarıhynda 3 márte kezdespekshi. Bir qyzyǵy, Ýrýgvaı ázirge bul qarsylasyn jeńip kórgen joq. Ekeýi de joldastyq kezdesý retinde ótken. 2002 jylǵy 27 naýryzda Saýd Arabııasy quramasy Ońtústik Amerıka ókilderin 3:2 esebimen basym tústi. Al 2014 jyldyń 10 qazanynda ótken oıyn 1:1 eseppen aıaqtaldy. Endeshe, Ýrýgvaı jeńiske jetse, sol olqylyqtyń ornyn toltyrady.
Budan buryn Portýgalııa - Marokko quramalary oıyny aldyndaǵy sholý jasaldy. Bul kezdesý búgin, 20 maýsymda saǵat 21.00-de ótkiziledi. Oıyn «Qazaqstan» ulttyq telearnasynan tikeleı efırde kórsetiledi.
Sondaı-aq, búgin V tobyndaǵy Portýgalııa - Marokko («Qazsport». 18.00), Iran - Ispanııa («Qazaqstan». 00.00) quramalary ózara myqtylardy anyqtaıdy.
Qalǵan oıyndardyń tolyq kestesin myna jerden kórýge bolady.
