ÁCh-2018: Ýrýgvaı Saýd Arabııasyn aqyry jeńdi
ASTANA. QazAqparat - Fýtboldan álem birinshiliginiń fınaldyq kezeńi boıynsha A tobyndaǵy ekinshi týr oıyndary máresine jetti. Ýrýgvaı Saýd Arabııasyn 1:0 esebimen jeńdi dep habarlaıdy QazAqparat.
Keshe, 19 maýsymda Reseı quramasy Egıpetti jeńip, jarysty jalǵastyrýǵa bir taban jaqyndaǵan edi. Mamandar taǵy bir joldama Ýrýgvaıǵa buıyrýy múmkin degen boljam aıtty. Ras, eki oıynda Egıpetten jeńilisten kóz ashpaǵan Egıpetten ózgesiniń barlyǵy óz tobynda alǵashqy eki orynǵa qol jetkizý múmkindiginen aırylǵan joq. Sondyqtan Ýrýgvaı men Saýd Arabııasy arasyndaǵy kezdesý jankúıer úshin osy jóninen qyzyqty bolatyn.
Biz Ýrýgvaı quramasynyń Saýd Arabııasymen budan burynǵy 2 kezdesýinde jeńiske jete almaı kele jatqany jóninde aıtqan edik.
Ońtústik Amerıka qurlyǵy ókilderi ózderinen álsiz quramaǵa kóbirek kúsh jumsaýǵa onsha nıetti emes sekildi. Degenmen quramanyń bas bapkeri Oskar Tabares jankúıerge esimi belgili Lýıs Sýares pen Edıson Kavanı syndy sańlaqtardy alǵashqy mınýttan jasyl alańǵa shyǵardy. Alǵashqy mınýttarda qos qurama tarapynan belsendi qımyl kózge túse qoımady. Dop qos qaqpaǵa mańyna jolaı qoıǵan joq. Bir sátterde arab fýtbolshylary dopqa ıelik etý jóninen basymdyq tanytyp turdy. Kezdesýdiń 12-mınýtynda Frantsııanyń PSJ sapynda oınaıtyn Edıson Kavanı qarsylastar qaqpasy mańynda qaýipti shabýyl uıymdastyrdy.
Alaıda ol tepken dop qaqpadan birshama joǵary ketti. Arada úsh mınýt ótkende ol taǵy da Saýd Arabııasy quramasyn taǵy bir márte mazalady. Bul joly da dáldik tanyta almady. Osydan keıin Lýıs Sýarestiń de gol soǵatyn múmkindigi týǵan edi. Bul fýtbolshy da óziniń mergendigin kórsete almady. Kezdesýdiń 23-mınýtynda Lýıs Sýares óziniń degenine jetti. Arab qaqpashysynyń óreskel qateliginen ol dopty bos qaqpaǵa baǵyttaı saldy. Alǵashqy kezeńde budan ózge birshama qaýipti sátter boldy. Birinshi kezeńniń sońyna taman ýrýgvaılyqtar negizinen qorǵanysta júrdi. Kezdesýdiń alǵashqy 45-mınýty 1:0 esebimen Ýrýgvaı jeńisimen aıaqtaldy.
Ekinshi kezeńde de saýdtyqtar qarsylastar qaqpasy aýmaǵyna jetýge tyrysty. Al 51-mınýtta Lýıs Sýares dopty shirene tepken edi. Ony arab qaqpashysy qaıtardy. Al 66-mınýtta Edıson Kavanı osyndaı múmkindikti paıdalana alǵan joq. Odan keıin birshama ýaqyt ýrýgvaılyqtar qarsylastaryna dop bermeı júrdi. Arabtar da áli de jeńiske jetýden úmitterin úzbegen sekildi. Qoldan kelgenshe gol soǵý jolyn izdep júrgeni ańǵaryldy. Ýrýgvaı shabýylshysy Edıson Kavanı esepti ulǵaıtý múmkindigin jiberip aldy.
Esterińizge sala ketelik, A tobyndaǵy ekinshi týrdyń alǵashqy oıyny keshe, 19 maýsymda oınalyp, onda Reseı men Egıpet quramalary kezdesti.
Bul toptaǵy kelesi týr 25 maýsymda ótkizilip, Saýd Arabııasy men Egıpet, Ýrýgvaı men Reseı kezdesedi.
Sondaı-aq, búgin V tobyndaǵy Portýgalııa Marokkodan basym tússe, saǵat 00.00-de Iran men Ispanııa sheberlik baıqasady.
Oıyn Oıyn «Qazaqstan» ulttyq telearnasynan tikeleı efırde kórsetiledi.
Qazirge deıin jarystyń 1/8 fınaldyq satysyna shyqqan úsh qurama anyqtaldy. Olar - Reseı, Ýrýgvaı, Portýgalııa.
Ádiljan Úmbet
