ÁCh-2018: Ýrýgvaı Portýgalııany jeńdi
ASTANA.QazAqparat - Búgin Reseı jasyl alańdarynda ótip jatqan 2018 jylǵy Álem chempıonatynyń 1/8 fınaly aıasynda Sochıdiń «Fısht» stadıonynda Ýrýgvaı jáne Portýgalııa quramalary kezdesti, dep habarlaıdy QazAqparat tilshisi.
Oıyn aldynan alań ortalyǵynda ýrýgvaılyqtar birshama basymdyqqa ıe bolady degen boljamdar aıtylǵan bolatyn.
AlaıdaÝrýgvaıdyń jyldam golynan keıin oıyn múldem basqasha órbidi. 7-mınýtta sol qanattan Lýıs Sýarestiń áýelete asyrǵan dobynan keıin Edınson Kavanı esep ashty. Kútpegen jerden gol jiberip alǵan portýgalııalyqtar oıyn tizginin túgel qolǵa alyp, tolassyz shabýyldady. Degenmen esepti teńestirý birinshi taımda múmkin bolmady.
Ekinshi taımda ótkir shabýyldaryn kúsheıte túsken pıreneılikter 55-mınýtta degenderine jetti. Buryshtamadan keıin Rafael Gerreıro dopty áýeden aıyp alańyna asyrdy. Qorǵaýshylardan bıik sekirgen Pepe basymen soǵyp, esepti teńestirdi.
Biraq portýgalııalyqtardyń qýanyshy kópke sozylǵan joq. Jyldam shabýyldan soń Edınson Kavanı ekinshi golyn soǵyp, komandasyn taǵy da alǵa bastady. Bul joly Portýgalııa esepti teńestire almady. Oıyn, osylaısha, 2:1 esebimen aıaqtaldy. Endi shırek fınalda Ýrýgvaı Frantsııamen kezdesetin boldy.
Buǵan deıin Frantsııa quramasy shırek fınaldyń alǵashqy qatysýshysy atanǵanyn habarlaǵan bolatynbyz.
