ÁCh-2018: Shveıtsarııa týrnırden erte shyǵyp qalǵan grandtar qataryna qosyldy
ASTANA. QazAqparat - Reseı jasyl alańdarynda ótip jatqan 2018 jylǵy Álem chempıonatynyń 1/8 fınaly kezinde búgin «Sankt-Peterbýrg» stadıonynda Shvetsııa jáne Shveıtsarııa quramalary kezdesti, dep habarlaıdy QazAqparat tilshisi.
Shveıtsarııa oıynnyń basynan aıaǵyna sheıin shabýyldady. Olardyń quram jaǵynan basymdyǵy da, 66-mınýtta óz qaqpasyna gol jiberip alǵany da osyǵan ıtermeledi. Oıyn aldynda shvedterdiń myqty qorǵanys shebin jaryp kirý óte qıyn ekendigi aıtylǵan bolatyn.
«Bankırler» negizinen eki qanattan uıymdastyrylatyn shabýyldarǵa ıek artyp júrdi. Aıyp alańyna ortadan jaryp kirýdiń sáti túspegen sátterde birneshe ret týra soqqy baǵyttap ta kórdi. Biraq olardan nátıje shyǵarý jaǵy aqsap jatty. Esesine qolaıly sátti golǵa aınaldyrý boıynsha Skandınav túbeginiń ókilderi sabaq bere alatynyn kórsetti. 66-mınýtta V. Lındelef dopty qorǵanystan shyǵaryp, sol qanatqa asyrdy. Toıvonen alań ortalyǵyndaǵy Forsbergke pas berdi. E. Forsbergtiń kúshti soqqysy jolaı shveıtsarııalyqtardyń qorǵaýshysy M. Akandjıdiń aıaǵyna tıip, qaqpanyń oń jaq joǵary buryshyna baryp kirdi.
Shabýylǵa berilgen shveıtsarııalyqtar sońǵy mınýtta penaltıden taǵy bir gol jiberip alýy múmkin edi. Biraq slovenııalyq Damır Skomına vıdeoqaıtalaýdy kórgen soń penaltı emes, aıyp alańynyń syrtynan aıyp dobyn tebý kerek ekenin kórsetti. Budan shvedter eshqandaı nátıje shyǵara alǵan joq. Oıyn osymen aıaqtaldy.
Endi shırek fınalda Shvetsııa Anglııa jáne Kolýmbııa matchynyń jeńimpazymen kezdesedi.
