ÁCh-2018: Shveıtsarııa quramasy jarysty jalǵastyratyn boldy
ASTANA. QazAqparat - Fýtboldan álem birinshiligi máresine jetýge jaqyn qaldy. Toptyq kezeńniń sońǵy týr oıyndary ótip jatyr. E tobynda Shveıtsarııa men Kosta-Rıka quramalary kezdesti, dep habarlaıdy QazAqparat tilshisi.
Kosta-Rıka alǵashqy eki týrda jeńildi. Sodan keıin joldamadan erterek qur qalǵan quramalar qataryna qosyldy. Sońǵy týr olar úshin eshqandaı máseleni sheshpeıtin. Esesine Shveıtsarııa áli de jarysty jalǵastyrýdan úmit úzgen joq edi. Alǵashqy eki týrdyń qorytyndysy boıynsha týrnır kestesinde ekinshi orynda turdy. Teń túsken jaǵdaıdyń ózinde jarystyń kelesi satysyna shyǵýǵa joldamany qaltaǵa basatyn. Sondyqtan bolar, Kosta-Rıkamen oıyn barysynda olar shabýyl shebine kóbirek kóńil bóldi.
Shveıtsarııa sońǵy jyldarda táýir oıyn órnegin kórsetip keledi. Qazir FIFA reıtınginde 6-orynda tur. Bul olardyń áleýetin ańǵartady. Dese de álemdik fýtbolda joǵary baǵalana bermeıdi. FIFA reıtınginde Kosta-Rıka 23-orynda keledi. Bul da jaman kórsetkish emes. Qos qurama buǵan deıin 2 márte kezdesken. Ekeýi de bir-birden jeńiske jetken. Búgingi deıin olar tek joldastyq kezdesýde jolyqqan eken. Alǵashqy kezdesý 2006 jyly Shveıtsarııanyń Jeneva qalasynda ótip, onda alań ıeleri 2:0 esebimen jeńiske jetti. Al 2010 jyly sol eldiń Son qalasyndaǵy stadıonda qonaqtar 1:0 esebimen basym tústi. Álem birinshiliginiń toptyq kezeńinde joldary túıisken qos qurama bıyl tuńǵysh ret resmı matchyn ótkizip otyr.
Atalmysh kezdesýde Shveıtsarııa quramynda Zommer qaqpany qorǵasa, Lıhtshtaıner, Sher, Akandjı, Rodrıges, Behramı, Djaka, Shakırı, Djemaılı, Embolo, Gavranovıch oıynshylar retinde jasyl alańǵa shyqty. Al Kosta-Rıka quramynda qaqpa Navasqa senip tapsyrylsa, Akosta, Gonsales, Ýoston, Gamboa, Ovedo, Borhes Selso, Gýsman, Kolındres, Rýıs jáne Kempbell sekildi jigitterge shveıtsarııalyqtarǵa qarsy oıyn kórsetý múmkindigine ıe boldy.
Oıyn barysynda Shveıtsarııa quramasy alǵa enteleı umtyldy. Gol 31-mınýtta soǵyldy. Brıl Embolo pasynan keıin ony Blerım Djemaılı qaqpaǵa engizdi. Osylaısha Shveıtsarııa alǵa shyqty. Birinshi kezeńde budan keıin esep ózgerissiz boldy. Ekinshi kezeńniń 56-mınýtynda kosta-rıkalyq Kendal Ýoston tarazy basyn teńestirdi. 88-mınýtta shveıtsarııalyq Iosıp Domıch óz quramasyn alǵa shyǵarsa, 93-mınýtta kosta-rıkalyq Braıan Rýıstiń tekpen doby qaqpa mańdaıshasyna tıdi. Odan keıin qaqpashy ıAn Zommerdiń arqasyna tıip, qaqpa torynan tabyldy. Bul toptaǵy taǵy bir oıyn - Brazılııa men Serbııa arasynda ótip, Neımar bastaǵan jigitter 2:0 esebimen jeńdi. Birinshi oryn jeti upaı jınaǵan Brazılııaǵa buıyrsa, bes upaımen Shveıtsarııa ekinshi joldamaǵa ıe boldy. Jarystyń kelesi satysynda, Brazılııa Meksıkamen 2 shildede, Shvetsııa Shveıtsarııamen 3 shildede kezdesedi.
28 maýsym kúni álem birinshiligi toptyq kezeńiniń sońǵy týr oıyndary ótedi. Bul kúnderi G jáne H toptaryndaǵy quramalar kezdesedi. H tobynda Senegal men Kolýmbııa («Qazsport».20.00), Japonııa men Polsha («Qazaqstan». 20.00) sheberlik baıqassa, G tobynda Panama men Týnıs («Qazsport».00.00), Anglııa men Belgııa («Qazaqstan». 00.00) oınaıdy.
