ÁCh-2018: Senegal taǵy da sensatsııa jasaı ma

Ashyǵyn aıtqanda, bul kezdesýge jankúıer asa zor qyzyǵýshylyq tanyta qoımaıdy. Sebebi belgili, qos quramanyń da álemdik fýtbolda alyp bara jatqan bedeli joq. Ortanqol quramalar sanatyna enedi. Ras, quramynda sheberligi shyńdalǵan sańlaqtar bar. Aldymen Polsha jaıynda aıta ketelik. Polıak jigitteri buǵan deıin 4 márte dúbirli dodaǵa keldi. 1974, 1982 jyldary qola júldeger atandy. Bul olardyń dáýiri dúrildep turǵan kezi bolsa kerek-ti. Odan keıin qatardaǵy quramalar sanatyna endi. Eýropa birinshiliginde 2016 jyly shırek fınalǵa deıin jetti. Olardyń sapynda Germanııanyń «Bavarııa» komandasynyń shabýylshysy Robert Levandovskı bar. Ústimizdegi jyldyń 21 tamyzynda orda buzar otyz jasqa tolatyn sańlaq óz quramasyn órge súıreı ala ma? Ol gol soǵý jóninen quramasynda rekord ornatqan. Búgingi kúnge deıin 91 márte jasyl alańǵa shyǵyp, qarsylastar qaqpasyn 51 márte dál kózdedi. Osynyń nátıjesinde ol 1963-1980 jyldarda qurama jeıdesin kıgen Vlodzımej Lıýbanskııdiń rekordyn jańartty. Ázirge ony basyp ozatyn eshkimniń qarasy kórinip turǵan joq.
Polsha irikteý kezeńinde bizdiń Qazaqstan quramasymen birge E tobynda synǵa túskeni belgili. Alǵashqy týrda 2016 jyldyń 4 qyrkúıeginde olar bizdiń jigittermen 2:2 esebimen teń oınady. Esesine qarymta kezdesýde 3:0 esebimen oısyrata jeńdi. Іrikteý kezeńinde syrt alańda Danııadan 0:4 esebimen jeńilip jáne bizdiń quramamen teń oınaǵany bolmasa qalǵanynyń barlyǵynda úsh upaı oljalady.
Óz tobynda birinshi orynmen álem birinshiligine tikeleı joldama aldy. Quramanyń bas bapkeri Adam Navalka shákirtteriniń aldaǵy oıynǵa tastúıin daıyn ekenin jetkizdi. Alǵan jaraqatyna baılanysty qorǵaýshy Kamıl Glıktiń Senegalǵa qarsy shyǵý-shyqpaýy belgisiz bolyp otyr. Qazir olar FIFA reıtınginde 8-orynda keledi.
Senegal quramasy 2002 jyly aıdy aspanǵa bir-aq shyǵardy. Afrıkalyqtar irikteý kezeńinde jarystyń birinshi satysynda Benındi orta jolda tastap, toptyq satysynda Marokko, Mysyr, Aljır, Namıbııa sekildi qarsylastaryn artta qaldyrdy. Osylaısha Ońtústik Koreıa men Japonııadaǵy dúbirli dodaǵa jetken afrıkalyq qurama alǵashqy kezdesýde azýly Frantsııany 1:0 esebimen jeńip, odan keıin Danııamen 1:1, Ýrýgvaımen 3:3 esebimen teń oınady. Jarystyń 1/8 satysynda Shvetsııany qosymsha kezeńde 2:1 esebimen jeńdi. Olardyń ekpinin Túrkııa basty. Túrik jigitteri shırek fınalda satysynda Senegaldy qosymsha kezeńde 1:0 esebimen súrindirdi. Odan keıingi jyldarda mundaı qarqyndy oıynymen daralana qoıǵan joq.
Esesine olar Afrıka ulttary kýbogynyń fınaldyq kezeńine 14 márte shyǵyp, 2002 jyly kúmis júldeger boldy. FIFA reıtıngisinde olar 27-orynda keledi. Osydan 16 jyl buryn qurama sapynda ózge oıynshylar jasyndaı jarqyldap kózge túsken edi. Bul kezeńde quramaǵa frantsýz mamany Brıýno Metsıý bapkerlik jasady. Qazir olardyń ornyn jastar almastyrdy. Osyndaı úzdikter qatarynda Anglııanyń «Lıverpýl» komandasynda ter tógip júrgen Sadıo Maneni aıtýǵa bolady. 2015 jyldan beri ulttyq quramany jergilikti maman Alıý Sısse jattyqtyrady. Jalpy, Senegal taǵy bir sensatsııa jasaı ma degen úmit bar. Óıtkeni, bul toptaǵy quramalardyń sheberlik deńgeıi bir-birimen qaraılas. Topta Polsha men Senegaldan ózge Kolýmbııa men Japonııa synǵa túsedi.
Bul kezdesý búgin, 19 maýsymda bolady. Oıyn 21.00-de «Qazaqstan» ulttyq telearnasynan tikeleı efırde kórsetiledi.
Qalǵan oıyndardyń tolyq kestesin myna jerden kórýge bolady.