ÁCh-2018: Saýd Arabııasy Egıpetten basym tústi
ASTANA. QazAqparat - Fýtboldan Álem chempıonaty aıasynda Reseıde «A» tobyndaǵy kezekti match ótti. Bul joly Egıpet quramasy Saýd Arabııasyn qabyldady. Alǵashqy eki oıynda birde-bir upaı ala almaǵan qos qurama osylaısha eshqandaı joldama bermeıtin kezdesý ótkizýge májbúr boldy, dep habarlaıdy QazAqparat tilshisi.
Mamandar Saýd Arabııasymen salystyrǵanda Egıpettiń quramy myqty ekenin aıtqan edi. Egıpet quramasy sapynda Anglııa Premer-lıgasynda oıyn kórsetip júrgen oıynshylar barshylyq. Atap aıtqanda, «Vest Brombıch Albıonnan» Alı Gabr, «Aston Vılladan» Ahmed al-Mýhammdı, «Ýıgan Atletıkten» Sem Morsı, «Stok sıtıden» Ramadan Sobhı, «Arsenaldan» Mohammed el-Nennı jáne «Lıverpýlden» ataqty Mohamed Salah bar. Saýd Arabııasy quramynda Ispanııanyń ortanqol ujymdarynda oıyn kórsetetin úsh oıynshy bar. Olar - ıAhıa ash-Shehrı («Leganes»), Salım al-Davsarı («Vılıareal») jáne Fahad al-Mývallad («Levante»). Qalǵanynyń barlyǵy óz eliniń birinshiliginde oıyn kórsetip júr. Budan buryn «Egıpet quramasy Mohamed Salahsyz oınaı ma?» degen taqyrypta maqala usynǵan bolatynbyz.
Oıynǵa qaıta oralsaq, match tizginin aldymen Egıpet fýtbolshylary ustaýǵa tyrysty. Alǵashqy sátterden qarsylastar qaqpasy jaǵyna lap qoıǵan olar óz degenine 23-mınýtta jetti. Ataqty Mohamed Salah óziniń sheberligin tanytyp, kezdesý barysyndaǵy alǵashqy goldy soqty. Aıta keteıik, Mohamed Salah Egıpet quramasy tarıhynda álem birinshiliginiń fınaldyq kezeńinde eki gol soqqan ekinshi fýtbolshy bolyp otyr. 1934 jyly Vengrııamen kezdesýde Abdýrrahman Faýzı qos goldyń avtory atanǵan edi.
Biraq bul gol Saýd Arabııasynyń eńsesin basa qoımaǵan sekildi. Arabtar alǵa qaraı entelep, tarazy basyn teńestirýge umtyldy. Al 39-mınýtta Egıpettiń qaqpasyna penaltı belgilendi. Afrıkalyq qurama qorǵaýshysynyń biriniń qolyna dop tıdi. Kolýmbııalyq tóreshi Vılmar Roldan Peres oılanbastan 11 metrlikti nusqady. Degenmen ony arab fýtbolshysy Fahad Al-Mývallad qaqpaǵa engize almady. Onyń tepken dobynyń baǵytyn sezgen Essam El-Hadarı qaqshyp aldy.
Saýd Arabııasy birinshi kezeńde tarazy basyn teńestire aldy. Olardyń sapynan Salman Al-Farıdj gol soǵyp, óz quramasyn jeńiske jeteleı tústi. Ol Egıpet qaqpasyna belgilengen ekinshi penaltıdi sheber oryndaı bildi. Kóp uzamaı birinshi kezeń de aıaqtaldy. Aıta keterligi, oıynnyń kóp bóliginde Egıpet quramasy basymdyq kórsetti. Degenmen olar gol sanyn molaıtýǵa qol jetkize almady.
Ekinshi kezeńde arabtar birneshe qaýipti sátterdi uıymdastyrdy. Degenmen onyń eshbirin paıdalana alǵan joq. Bul toptaǵy Ýrýgvaı men Reseı quramasy arasyndaǵy kezdesýde ýrýgvaılyqtar 3:0 esebimen jeńiske jetti. Birinshi oryn Ýrýgvaıǵa buıyrdy. Ekinshi oryndy Reseı enshiledi. Osy eki qurama jarysty jalǵastyratyn boldy. Sońǵy oıynda Egıpetti 2:1 esebimen jeńgen Saýd Arabııasy úshinshi oryn alsa, Egıpet sońǵy orynda qalyp qoıdy.
Al V tobynda búgin Iran men Portýgalııa («Qazaqstan». 00.00), Ispanııa men Marokko («Qazsport». 00.00) quramalary sheberlik baıqasady.
Ádiljan Úmbet
