ÁCh-2018: Reseı Saýd Arabııasyn iri eseppen jeńdi
ASTANA. QazAqparat - Fýtboldan 2018 jylǵy álem birinshiliginiń alǵashqy oıyny aıaqtaldy. Alań ıeleri - Reseı quramasy Saýd Arabııasynan 5:0 esebimen basym tústi, dep habarlaıdy QazAqparat tilshisi.
Eki qurama buǵan deıin 1 márte kezdesý ótkizgen eken. 1993 jyly ótken joldastyq kezdesýde arab jigitteri 4:2 esebimen basym túsken edi. Al resmı kezdesýde ekeýi eshqashan kezdesip kórgen joq.
Aıta ketelik, eki qurama da FIFA reıtınginde orta deńgeıde keledi. Atap aıtqanda, Reseı 70-orynda tursa, Saýd Arabııasy olardan úsh satyǵa joǵary tur. Álem chempıonatynyń tarıhynda mundaı tómengi reıtıngte júrgen qos qurama jarys shymyldyǵyn ashqan joq edi.
Bul kezdesýge argentınalyq tóreshi Nestor Pıtana qazylyq etti. Oıynnyń 12 mınýtynda Reseı quramasynyń jartylaı qorǵaýshysy ıÝrıı Gazınskıı gol soqty. Ol óziniń áriptesi Aleksandr Golovınniń sol qanattan áýelete bergen dobyn baspen qaqpaǵa baǵyttap, álem birinshiliginiń alǵashqy golynyń avtory atandy. Budan keıin de Reseı quramasy qarsylastar qaqpasy aldynda birneshe qaýipti sátterdi uıymdastyrdy. Oıynda negizinen alań ıeleriniń basymdyǵy kórinip turdy. Oıynnyń 23-mınýtynda reseılik fýtbolshy Alan Dzagoev jaraqat alyp, ony áriptesi Denıs Cheryshev almastyrdy. Oıynnyń birinshi kezeńi asa joǵary deńgeıde tartysty ótken joq. Dop negizinen alań ortasynda kóbirek kórindi. Oıynnyń 43-mınýtynda Roman Zobnınniń pasynan keıin Denıs Cheryshev Saýda Arabııasy qaqpasynan sańylaý tapty. Esep 2:0.
Kelesi eki dop oıynnyń ekinshi kezeńinde soǵyldy. Reseı shabýylshysy Artem Dzıýba esepti 3:0-ge jetkizse, oıynnyń 91-mınýtynda Denıs Cheryshev taǵy bir dop soqty. Oıynnyń núktesin 94-mınýtta Aleksandr Golovın qoıdy. Qorytyndy esep 5:0. Reseı jeńiske jetti.
Saýd Arabııasy álem birinshiliginiń fınaldyq kezeńine 5-márte qatysyp otyr. 1994 jyly AQSh-ta ótken álem birinshiliginde olar 6 topta synǵa túsip, ekinshi orynmen jarystyń 1/8 fınaldyq kezeńine joldama aldy. Marokkony 2:1, Belgııany 1:0 esebimen jeńip, Gollandııadan 1:2 esebimen jeńilip qaldy. Jarystyń 1/8 fınaldyq kezeńinde olar Shvetsııadan 1:3 esebimen jeńilip, jarysty aıaqtaýǵa májbúr boldy. Arab fýtbolshylary odan keıin 1998, 2002, 2006 jyldarda dúbirli dodanyń fınaldyq kezeńinde baq synaǵanymen, óz tobynda tórtinshi orynnan asa almady. Al reseılikter KSRO quramasy kórsetkishterimen qosa eseptegende álem birinshiliginiń fınaldyq kezeńinde 11 márte baq synady. KSRO quramasy 1958, 1962, 1970, 1982 jyldary 1/4 fınalǵa deıin jetse, 1966, 1990 jyldary óz tobynda tórtinshi orynnan asa alǵan joq. 1986 jyly 1/8 fınaldyq kezeńge jetti. KSRO quramasynyń zańdy murageri sanalatyn Reseı quramasy bıylǵy birinshilikti eseptemegende buǵan deıin 1994, 2002, 2014 jyldarda fınaldyq kezeńde synǵa túsip, úsheýinde toptyq kezeńde úshinshi oryndy mise tutty.
Reseı quramasy endigi kezdesýin 19 maýsymda Egıpet quramasyna qarsy ótkizse, 20 maýsymda Ýrýgvaı men Saýd Arabııasy sheberlik baıqasady. A tobynyń ekinshi kezdesýi erteń, 15 maýsymda Egıpet jáne Ýrýgvaı quramalarynyń arasynda ótedi. Sondaı-aq, 15 maýsymda V tobyndaǵy Marokko - Iran, Portýgalııa - Ispanııa quramalary arasynda oıyndar bolady.
