ÁCh-2018: Reseı men Ýrýgvaı toptyń myqtysyn anyqtaıdy

Qos qurama alǵashqy eki týrda jaqsy oıyn órnegin kórsetti. Álem birinshiliginiń qojaıyndary aldymen Saýd Arabııasyn 5:0 esebimen jeńse, odan keıin Egıpetten 3:1 esebimen basym tústi. Osylaısha toptyq kezeńge berilgen joldamany erterek qaltaǵa basyp úlgerdi. Ýrýgvaıdyń da jaǵdaıy solarǵa uqsas. Aldymen Egıpet, sosyn Saýd Arabııasyn 1:0 esebimen tize búktirdi. Eki oıynda nebári 2 dop soqqanymen qajetti 6 upaıdy qaltaǵa basyp otyrǵan jaıy bar. Jalpy, qos quramanyń áleýeti ekeýiniń kezdesýinde belgili bolatyn sekildi. Qaı jeńgeni toptyq kezeńde birinshi oryn alady. Olar V tobyndaǵy alǵashqy eki orynǵa ıe bolǵan quramalarmen sheberlik baıqasatyny belgili. V tobynda Ispanııa men Portýgalııa alǵashqy eki oryndy ózara bólisip otyr. Sondaı-aq, odan Iran quramasynyń da úmiti bar. Parsylar búgin Portýgalııany tize búktirse, jarysty jalǵastyrý múmkindigine ıe bolýy ǵajap emes. Sol sebepti Reseı men Ýrýgvaı birinshi jáne ekinshi orynnyń birin alsa da, kelesi toptaǵy myqtylardyń birimen jup quraıdy. Sondyqtan olar úshin jarystyń kelesi satysyndaǵy oıyn mańyzdy sekildi. Ázirge A tobynda Reseı kósh basynda keledi.

Ýrýgvaı quramasynyń ardager oıynshysy Dıego Forlan aldaǵy oıyn jaıynda «Bizdiń quramada Lýıs Sýares pen Edınson Kavanı sekildi mańdaıaldy oıynshylar bar. Degenmen Reseı quramasynda sheberligi shyńdalǵan sheberler az emes. Soǵan qaraı otyryp aldaǵy kezdesý bizder úshin ońaıǵa soqpaıtynyn eskerýimiz tıis»,- degen edi. Ataqty bapker Joze Moýrıno da bul jaıynda «Kezdesý tartysty ótetini anyq. Reseıge jankúıerler qoldaýy jaǵymdy áser eteri sózsiz. Sondyqtan Ýrýgvaıǵa óte jınaqy oıyn kórsetý - basty talap», - degen oıyn bildirdi.

Búgingi kezdesýge Reseıdiń jartylaı qorǵaýshysy Alan Dzagoevtyń qatysa almaıtyny belgili bolyp otyr. Quramanyń bas bapkeri Stanıslav Cherchesov «Ol jalpy jattyǵýǵa qatysyp júr. Degenmen biz onyń qalpyna tolyq kelgenin qalaımyz. Sondyqtan ol Ýrýgvaımen kezdesýge qatysa almaıdy», - degen oıyn bildirdi.

Jerebe tartylǵan sátte Ýrýgvaı toptyń kóshbasshysy bolady degen joramal aıtylǵan edi. Reseımen kezdesýde sol úmit aqtala ma? Ony oıyn barysynda anyqtaıtyn bolamyz. Kerisinshe, Reseıge kúdikpen qaraǵandar az bolǵan joq. Olardy «Toptyq kezeńnen de shyǵa almaıdy», - degender de kezdesti. Esesine olar eki oıynda da jankúıer senimin aqtaıtyn oıyn órnegin kórsetti. Búgingi básekede orys fýtbolshylary Ýrýgvaıdy jeńip jatsa, onda aldaǵy kezeńde quramaǵa senim bildiretin jankúıerler qatary kóbeıetini anyq.

Bul oıyn búgin, 25 maýsymda Samara qalasynda bolady. Kezdesý 20.00-de «Qazaqstan» ulttyq arnasynda tikeleı efırden kórsetiledi. Sondaı-aq, búgin osy toptaǵy Saýd Arabııasy men Egıpet («Qazsport». 20.00) quramalary jasyl alańǵa shyǵady. Al V tobynda Iran men Portýgalııa («Qazaqstan». 00.00), Ispanııa men Marokko («Qazsport». 00.00) quramalary sheberlik baıqasady.