ÁCh-2018: Reseı Ispanııany jeńip, shırek fınalǵa shyqty
ASTANA. QazAqparat - Búgin Reseı jasyl alańdarynda ótip jatqan 2018 jylǵy Álem chempıonatynyń 1/8 fınaly aıasynda Máskeýdiń «Lýjnıkı» stadıonynda Ispanııa jáne Reseı quramalary kezdesti, dep habarlaıdy QazAqparat tilshisi.
Oıyn aldynan Ispanııa favorıt retinde kórsetilgen bolatyn. Biraq chempıonat qojaıyndary olarǵa tabandy qarsylyq kórsete aldy. 12-mınýtta pıreneılikter aıyp dobyn oryndaǵannan soń esep ashyldy. Sergeı Ignashevıchtiń aıaǵynan serpilgen dop kútpegen jerden qaqpaǵa baǵyt alyp, Igor Akınfeevti qapy qaldyrdy. Jyldam salynǵan goldan keıin, dopty ıspandyqtar kóbirek ustaǵandyqtan, oıynnyń qarqyny birshama báseńdegendeı boldy. 41-mınýtta reseılikter buryshtamadan keıin esepti teńestirdi. Ispanııa quramasynyń ortalyq qorǵaýshysy Pıkeniń qolyna dop tıgendikten, penaltı belgilendi. Artem Dzıýba on bir metrlik núkteden múlt ketken joq - 1:1.
Ekinshi taımda Ispanııa búkil alańda ústemdik ornatty. Taım sońǵy mınýtynda dopqa ıelik etý kórsetkishi 78/22 paıyz, al qaqpaǵa baǵyttalǵan soqqylar kórsetkishi 8:0 bolǵany da osyny rastasa kerek. Alaıda eshbir komandaǵa oıynnyń negizgi ýaqytynda jeńis golyn soǵýdyń sáti túsken joq.
Gollandııalyq tóreshi Bern Kıýıpers komandalardy úziliske shaqyrdy. Endi oıyn taǵdyryn 15 mınýttan eki ekstra taım nemese penaltıler serııasy sheshetin boldy.
Taǵy da jarty saǵat boıy tek ıspandardyń shabýylyna kýá boldyq. Alaıda qosymsha otyz mınýtta da gol soǵylǵan joq.
Al fýtbol lotereıasynda sáttilik Reseı jaǵynda boldy. Penaltıler boıynsha esep: 4:3.
Aıta keteıik, endi Reseı shırek fınalda Horvatııa - Danııa oıynynda jeńiske jetken komandamen kezdesedi.
