ÁCh-2018: Perý quramasy jankúıerlerin qýanta ala ma
ASTANA. QazAqparat - Búgin, 26 maýsymda fýtboldan álem birinshiliginiń fınaldyq kezeńinde S jáne D tobyndaǵy oıyndar ótkiziledi. S tobynda Avstralııa men Perý quramalary kezdesedi, dep habarlaıdy QazAqparat tilshisi.
Avstralııa quramasy áli de jarysty jalǵastyrý múmkindiginen qol úzgen joq. Sondyqtan olar Perýmen kezdesýde baryn salary anyq. Oǵan Ońtústik Amerıka qurlyǵy ókilderi de qarap qalmaıdy degen úmittemiz. Perý álem birinshiligi fınaldyq kezeńine 36 jyldan keıin oraldy. Degenmen sátti oıyn kórsetti deı almaımyz. Alǵashqy eki oıynynda Danııa men Frantsııadan nebári bir-bir gol jiberip, jarystyń kelesi satysyna shyǵýdan erterek úmitin úzdi. Avstralııa aldymen Frantsııadan 1:2 esebimen jeńilgenimen, kelesi kezdesýde Danııamen 1:1 esebimen teń tústi. Osynyń nátıjesinde dop dodasynyń 1/8 fınaldyq satysyna shyǵýǵa áli de múmkindigi bar.
Bul kezdesý qos qurama arasyndaǵy tuńǵysh kezdesý bolǵaly otyr. Búgingi kúnge deıin olar bir-birimen eshqashan kezdesip kórgen emes. Bul da qos qurama úshin úlken syn. Kimniń myqty ekeni belgili bolady. Oǵan qosa, toptaǵy sońǵy oryn kimniń enshisine jazylady? Ol da osy oıyn barysynda anyqtalady. FIFA reıtıngisinde Perý 11-orynda tur. Avstralııa 36-orynǵa jaıǵasqan. Bul qos quramanyń sheberlik deńgeıin dál kórsete ala ma? Birinshilik barysynda jaqsy nátıjege qol jetkizgen quramalar reıtıngte jaǵdaıyn jaqsartyp alary anyq.
Aldaǵy oıyn jaıynda Perý quramasynyń shabýylshysy Paolo Gerrero: «Pleı-off kezeńine shyǵa almadyq. Soǵan qaramastan biz aldaǵy kezdesýge tyńǵylyqty daıyndalamyz. Elimizge qur qol qaıtqymyz kelmeıdi. Jankúıerlerdi úsh upaımen qýantamyz degen oıdamyz», - dedi.
Perý quramasynyń bas bapkeri Rıkardo Gareka «Bizde barlyǵy óz qalpynda júrip jatyr. Djefferson Farfan alǵan jaraqatynan aıyqty. Degenmen ol aldaǵy oıynǵa qatysa almaýy múmkin», - degen oıyn bildirdi. Al Avstralııa quramasynyń shabýylshysy Tomı ıÝrıch «Eger meniń golym Avstralııany pleı-off kezeńine alyp shyǵyp jatsa, ózim úshin naǵyz fantastıka bolar edi. Men óz quramamnyń jeńisine bar kúshimdi salamyn. Sondyqtan jeńis golyn kim soǵady - ol men úshin mańyzdy emes», - degen edi.
Atalmysh kezdesý búgin, 26 maýsymda Reseıdiń Sochı qalasyndaǵy «Fısht» stadıonynda ótedi. Oıyn 20.00-de «Qazsport» arnasynan tikeleı efırde kórsetiledi. S tobynda búgin taǵy bir oıyn Frantsııa men Danııa («Qazaqstan». 20.00) quramalary arasynda ótedi. Sondaı-aq, búgin D tobynda Nıgerııa men Argentına («Qazaqstan».00.00), Islandııa men Horvatııa («Qazsport». 00.00) quramalary kezdesedi.
