ÁCh-2018: Perý 36 jyldan soń mýndıalǵa qaıta oraldy
ASTANA. QazAqparat - Reseı tórinde ótip jatqan fýtboldan álem birinshiligi Perý jáne Danııa quramalary arasyndaǵy oıynmen jalǵasady. Bul kezdesý Astana ýaqytymen 22.00-de Reseıdiń Saransk qalasyndaǵy «Mordovııa-arena» stadıonynda ótkiziledi.
Biz eki qurama jaıynda ne bilemiz? Olar álemdik fýtbolda myqtylar qatarynda sanalmaıtyny belgili. Degenmen bul quramalar eshbir qarsylasy aldynda yǵyna jyǵyla qoımaıdy. Perý búginge deıin tórt márte dúbirli dodada baq synaǵan. 1930 jyly toptyq kezeńde Rýmynııa men Ýrýgvaıdan jeńildi. Odan keıin 1970 jyly Meksıka jerindegi aıtýly alamanda óz tobynda aldyna FRG quramasyn salyp, ekinshi oryn aldy. Odan keıingi oryndar Bolgarııa men Marokkonyń enshisine buıyrdy. Jarystyń kelesi kezeńinde Brazılııaǵa 2:4 esebimen jol berdi. 1978 jyly da osy jetistigin qaıtalady. Toptyq kezeńde Nıderlandy, Shotlandııa, Irandy artqa salyp, birinshi orynmen jarystyń kelesi satysyna shyqqan edi. Degenmen kelesi kezeńde Polshadan súrindi. Esep 0:1. 1982 jyly eki oıynda Kamerýn jáne Italııamen teń oınap, sońǵy kezdesýde Polshadan 1:5 esebimen oısyraı jeńildi. Óz tobynda tórtinshi orynnan árige asa alǵan joq. Sodan keıin Perý álem birinshiliginiń fınaldyq kezeńinde boı kórsetken joq. Bıylǵy dop dodasyna araǵa 36 jyl salyp oralyp otyr. Toptyq kezeńde besinshi oryn alǵan Perý pleı-offqa berilgen joldamaǵa qol jetkizdi. Bul joly syrt alańda Jańa Zelandııamen 0:0 esebimen teń túsken olar Perýde qarsylastaryna jaýapsyz eki dop soqty. Osynyń nátıjesinde Reseıge keletin quramalar qataryna qosyldy. Perý quramasy 1939 jáne 1975 jyldary Amerıka kýbogyna ıe boldy. Qurama sapynda jankúıerler jaqsy tanıtyn oıynshylar sany kóp emes. Paolo Gerrero esimdi fýtbolshynyń qan quramynan byltyr dopıng tabylǵan edi. Sonyń saldarynan birshama ýaqyt fýtboldan shettetildi. Degenmen oǵan taǵaıyndalǵan jaza merzimi qysqaryp, atalmysh fýtbolshy Reseı jerine keldi. Qurama sapynda reseılikterge jaqsy tanys Djeffersoný Farfan bar. Ol Máskeýdiń «Lokomotıv» komandasynyń namysyn qorǵaıdy. FIFA reıtınginde olar 11-orynda tur.
Álem birinshiliginde joǵary tabysqa qol jetkize almaǵanymen dat fýtbolshylary 1992 jyly Eýropa chempıony atanǵan edi. Al 1995 jyly Konfederatsııa kýbogyn tóbesine kóterdi. Álem birinshiliginde 1998 jyly shırek fınalǵa deıin jetti. Jalpy alǵanda, Danııa álem birinshiliginiń fınaldyq kezeńinde 5 márte baq synaý múmkindigine ıe bolǵan. 2018 jylǵy dúbirli dodaǵa olar pleı-off kezeńi arqyly jetti. Óz tobynda ekinshi orynda bolǵan olar pleı-off kezeńinde Irlandııamen kezdesip, qos oıynnyń qorytyndysymen (0:0, 5:1) Reseıge jol tartty. Danııa quramasy sapyndaǵy juldyz retinde Anglııanyń «Tottenhem» klýbynyń oıynshysy Krıstıan Erıksendi aıtýǵa negiz bar. Ol irikteý kezeńinde qarsylastar qaqpasyna 12 oıynda 11 gol soǵyp, mergendigimen tanyldy. Sondaı-aq, atalmysh qurama sapynda Pıone Sısto jáne Kasper Dolbergkti de mamandar joǵary baǵalaıdy. FIFA reıtınginde 12-orynda keledi.
Esterińizge sala ketelik, Perý men Danııa quramalary arasyndaǵy oıyn búgin 22.00-de bastalady. Bul kezdesý «Qazsport» telernasynda kórsetiledi. Týrnır oıyndarynyń tolyq kestesin myna jerden kórýge bolady.
