ÁCh-2018: Panamanyń Belgııaǵa qarsy qandaı aılasy bar

Belgııa quramasyn jankúıerler jaqsy biledi deýge negiz bar. Bul elden talaı myqty fýtbolshylar kóptiń kózaıymyna aınaldy. Sońǵy jyldarda da olardyń qatary sıregen emes. Anglııanyń «Chelsı» klýbyn órge súırep júrgen sańlaqtyń biri - Eden Azardyń sheberligi talaıdy tańdaı qaqtyrǵany sózsiz. Jalpy, atalmysh qurama dop dodasynyń fınaldyq kezeńinde buǵan deıin 12 márte baq synaǵan eken. Ázirge aýyz toltyryp aıtarlyq jetistigi - 1986 jylǵy tórtinshi oryn. Sol jyly Belgııa óz tobynan úshinshi orynmen jarystyń kelesi kezeńine shyqty. Aldymen Meksıkadan 1:2 esebimen jeńilgen olar kelesi kezdesýde dál osy eseppen Irakty tize búktirip, sońǵy oıynda Paragvaımen 2:2 esebimen teń nátıjege qanaǵat bildirdi. Jarystyń 1/8 fınalynda KSRO quramasyn 4:3 esebimen jeńip, odan soń azýly Ispanııadan da aılasyn asyrdy. Bul kezdesýde oıynnyń negizgi kezeńi 1:1 esebimen aıaqtaldy. Jeńimpaz penaltı arqyly anyqtaldy. Odan keıingi jyldarda olardyń tolymdy tabysy bola qoıǵan joq. Eýropa birinshiliginde 1972 jyly qola alsa, 1980 jyly kúmis júldeger atandy. Sońǵy kezeńde zor jetistigimen maqtana almaıdy. Qazirgi tańda FIFA reıtınginde 3-orynda tur. Bıylǵy álem birinshiligine irikteý kezeńinde Belgııa fýtbolshylary asa qınala qoıǵan joq. N tobynda synǵa túsken olar 10 oıynnyń 9-ynda jeńiske jetip, tek bireýinde teń nátıjege kórsetti.

Jalpy alǵanda, Roberto Martınestiń shákirtteri 19 kezdesý boıy jeńilip kórgen emes. Onyń ishinde 14 oıynda qarsylasynan basym tússe, 5-eýinde teń tarqasty.

Dop dodasyna kelgenshe olar 4 joldastyq kezdesý ótkizdi. Aldymen Portýgalııamen 0:0 esebimen teń túsip, sodan keıin Saýd Arabııasyn 4:0, Egıpetti 3:0, Kosta-Rıkany 4:1 esebimen jeńdi. Bir sózben aıtqanda, aıtýly alamanǵa daıyndyǵy jaman emes. Quramynda Eden Azarmen birge Anglııanyń «Manchester Sıtı» klýbynyń jartylaı qorǵaýshysy Kevın de Breıne sekildi jampozdar bar.

Al Panama jaıynda qalyń jankúıerdiń biletini shamaly. Olar 1974 jylǵa deıin álem birinshiliginiń irikteý kezeńinde baq synaǵan joq. 1978-2014 jyldar aralyǵynda ol kezeńnen óte almady. Bıylǵy dop dodasynyń irikteý kezeńi bastalardan buryn olar Reseıdegi dop dodasyna keletin 32 úzdiktiń qatarynda bolamyz dep armandamaǵan shyǵar. Ol arman aqıqatqa aınaldy. Olar AQSh jáne Gondýras sekildi tájirıbeli quramalardy artqa qaldyrdy. FIFA reıtınginde 55-orynda tur. Qurama sapynda Eýropa birinshiliginde dop tebetinder joqqa tán. Kóbisi AQSh, Meksıka, Gvatemala elderinde oınaıdy. Sondaı-aq, olar búginge deıin Eýropa quramalaryn eshqashan jeńip kórgen joq. Mamandar Panamany bıylǵy birinshiliktegi eń álsiz quramanyń qatarynda sanap otyr. Oǵan ózderi kelispeıdi. Joǵary jetistikke qol jetkizý jolynda bar kúshimizdi salamyz degen nıeti bar.

Bul kezdesý búgin, 18 maýsymda Reseıdiń Sochı qalasyndaǵy «Fısht» stadıonynda bolady. Oıyn Astana ýaqytymen 21.00-de «Qazaqstan» ulttyq telearnasynan tikeleı efırde kórsetiledi.   

Qalǵan oıyndardyń tolyq kestesin myna jerden kórýge bolady.