ÁCh-2018: Ońtústik Koreıadan jeńilgen Germanııa týrnırden shyǵyp qaldy
ASTANA. QazAqparat - Búgin fýtboldan Álem chempıonatynyń toptyq kezeńi 3-týry aıasyndaǵy F tobynyń kezdesýleri ótti. Germanııa quramasy Ońtústik Koreıadan jeńilip, jarys jolynan shyǵyp qaldy, dep habarlaıdy QazAqparat tilshisi.
Germanııa ulttyq quramasy o bastan osy kezdesýdiń favorıti dep sanalǵan bolatyn. Dopqa ıelik etý kórsetkishi de oıynnyń basynan aıaǵyna sheıin osyny dáleldep otyrdy. Birinshi taımda «nemis mashınasy» qarsylastar qaqpasyna aıtarlyqtaı qaýip tóndire almady. Qaıta koreı fýtbolshylary ara-tura jyldam qarymta shabýylǵa shyǵyp, 4 ret soqqy berip úlgerdi.
Úziliste bapkerler shtabynan qatań tapsyrmalar alyp qaıtqan Germanııa alańdaǵy ústemdigin arttyrǵan ústine arttyra tústi. 85-mınýttar shamasynda dopqa ıelik etý kórsetkishi tipti 80/20-ǵa da jetti. Biraq keıde soqqylar qıys ketip jatsa, keı sátterde Ońtústik Koreıa qaqpashysy Cho Hıýn Vý tamasha seıvter jasap, qaqpasyn goldan saqtap otyrdy.
«Sen gol soqpasań, saǵan soǵady» degen fýtboldyń tanymal maqaly osy jerde taǵy bir ret eske tústi. Negizgi ýaqytqa qosylǵan mınýttarda buryshtamadan keıin koreı fýtbolshysy Eń Gvon Kım gol soǵyp, esep ashty. Qarymta shabýyldardyń taǵy birinde Son Hyn Mın ekinshi dopty kirgizip, komandasyna jubanysh úsh upaıdy syıǵa tartty. Germanııalyqtar qanshama shabýyldasa da gol soǵa almaı, chempıonatty tárik etti.
Match Reseıdiń Qazan qalasynda «Qazan arena» stadıonynda ótti.
Foto: ru.fifa.com
