ÁCh-2018: Ońtústik Koreıa Shvetsııaǵa qarsy úzdik qurammen shyqpaq
ASTANA. QazAqparat - Búgin Shvetsııa jáne Ońtústik Koreıa quramalary fýtboldan 2018 jylǵy Álem chempıonatynyń F tobyndaǵy alǵashqy týr oıyndaryn qorytyndylaıdy, dep xabarlaıdy QazAqparat tilshisi.
Kári qurlyq ókiliniń koreıalyqtarǵa qaraǵanda álem chempıonattaryndaǵy tájirıbesi mol. Ótken ǵasyrdyń ortalarynda bir qola, bir kúmis alǵan shvedter 1994 jylǵy AQSh-ta ótken Álem chempıonatynda taǵy da júldegerler qatarynan kórindi. Alaıda Freddı ıÝngberg, Henrık Larsson, Anders Svenson sekildi sańlaqtardyń dáýreni ótken soń, daǵdarys baıqalyp, Ońtústik Afrıka Respýblıkasynda ótken 2010 jylǵy mýndıalǵa joldamadan qur qaldy. Al 2014 jylǵy chempıonatqa irikteý týrnıriniń S tobynda Germanııadan keıingi ekinshi orynǵa turaqtady. Toptaǵy ekinshi oryn tikeleı joldama bermegendikten, Portýgalııaǵa qarsy qosymsha oıyn ótkizýge týra keldi. Shvetsııa bul joly syrt alańda 1:0 esebimen, óz alańynda 2:3 esebimen utylǵan.
Týra osyndaı oıyn osy jolǵy chempıonattyń irikteý kezeńinde de boldy. Frantsııa, Gollandııa quramalarymen bir topqa túsken shvedter ekinshi oryndy ıelenip, qosymsha oıynda Italııa quramasyn jeńdi.
Fýtboly kenje qalǵan qurlyq ókili Ońtústik Koreıa 2002 jylǵy jetistigimen este qaldy. Oǵan deıingi mýndıaldardaǵy nátıjesi kóńil kónshitpeıtin «Tedjý jasaqtarynyń» óz alańynda (Japonııamen birge) ótken Álem chempıonatynda tasy órge domalady. Polsha, Portýgalııa, AQSh quramalaryn artta qaldyryp, óz tobynyń lıderi atandy. 1/8 fınalda juldyzdy qurammen barǵan Italııany jeńdi. Nebir tańdaýly fýtbolshylarymen ataǵy jer jarǵan Ispanııany shırek fınalda qapy qaldyrdy. Koreılerdi tek Germanııa, onda da 1:0 esebimen, jartylaı fınalda toqtata aldy. Al úshinshi oryn úshin ótken oıynda chempıonat qojaıyndary ózderi sııaqty taǵy bir sensatsııa ıesi - Túrkııa quramasynan «taıaq jedi» (2:3).
Sońǵy jyldary Ońtústik Koreıa fýtboly damyp keledi. Ký Dja Chhol, Kı Son En (kapıtan), Son Hyn Mın, Hvan Hı Chhan sııaqty fýtbolshylary Eýropada da meılinshe tanymaldylyqqa ıe.
Tarıhı jetistikterin qospaǵanda, FIFA reıtınginde Shvetsııanyń 19, Ońtústik Koreıanyń 57-orynda turǵany da komandalardyń ózara kúshter arasalmaǵy Eýropa ókilinde ekendigin bildirse kerek. Biraq keshe ǵana Meksıka Germanııany utyp, Shveıtsarııanyń Brazılııadan upaı tartyp alǵany álem chempıonatynda naǵyz myqty tek ózara oıynda anyqtalatynyn dáleldedi.
Oıyndy Astana ýaqytymen 18:00-de Qazsport arnasynan tikeleı efırde tamashalaı alasyzdar. Qalǵan oıyndardyń tolyq kestesin myna jerden kórýge bolady.
