ÁCh-2018: N tobynyń ortalyq matchynda Senegal men Kolýmbııa kúsh synasady
ASTANA. QazAqparat - Búgin fýtboldan 2018 jylǵy Álem chempıonatynyń toptyq kezeńi qorytyndylanady. Senegal jáne Kolýmbııa quramalarynyń kezdesýi N tobynyń ortalyq matchy bolmaq, dep habarlaıdy QazAqparat tilshisi.
Komandalar buǵan deıin eki ret kezdesken. 2011 jyly 2:0 esebimen Kolýmbııa basym tússe, 2014 jyly teń nátıje tirkelgen. Osy chempıonattyń ótken eki týrynda komandalar túrlishe oıyn órnegin kórsetti. Mamandar senegaldyqtardyń dene daıyndyǵy babynda emes ekenin betke basyp otyr. Olar osyǵan deıin óz qaqpasyna soǵylǵan úsh goldy da taımnyń sońyna qaraı jiberip alǵan. Al Kolýmbııa, kerisinshe, ári quram jaǵynan, ári oıynshylarynyń daıyndyǵy jaǵynan qarsylastaryna qaraǵanda bir saty joǵary.
Osy faktorlardy eskere kele, býkmekerlik keńseler de, fýtbol sarapshylary da «kofeshilerdiń» basym ekenin kórsetip otyr. Onyń ústine Latyn Amerıkasy ókili óz qateliginen qorytyndy shyǵara biletinimen kózge tústi. Olardyń ádisi, atap aıtqanda, Polshamen kezdesýdegi oıyny kópshilik jankúıerlerdiń kóńilinen shyqqany ras. Múmkindiginshe keńirek shep qura otyryp shabýyldaıdy, kútpegen jerden pas berip, komandalasyn yńǵaıly pozıtsııaǵa shyǵara biletin pleımeıkeri de bar, dopqa talas kezinde top qorǵaýshylardyń ózin qapy qaldyryp ketetin shabýylshysy da bar. Hames, Falkao, Kýadradolar mańyzdy oıyndarda tájirıbe jınaqtaǵan ári bir-birin ymmen túsinetin oıynshylar. Ótken oıynnan keıin, tipti Kınteroǵa Eýropanyń birneshe top-klýby quda túsýge nıettenip otyrǵany týraly sybystar tarap úlgerdi.
Osyndaı deńgeıdegi fýtbolshylar Senegalda kóp emes. Mane men Nıang «Dakar arystandarynyń» bas juldyzdary. Ádette, Senegal degende kóz aldymyzǵa sonaý 2002 jylǵy mýndıalda top jarǵan Pap Býba Dıop, Ál-Hajy Dıýfftar keletini bar. Bıylǵy Senegal qarqyndy ári mazmundy oıyn kórsetti dep aıta almaımyz. Sol sebepti, oıynnyń sapasy da kóńil kónshiterlik emes. Basy artyq pastar, qajetsiz qımyldar, offsaıdtyń kóp bolýy, ereje buzý kórsetkishiniń birshama joǵary bolýy bıylǵy Senegaldyń synshylaryn kóbeıtip otyr. Degenmen, Alıý Sısse komandasynyń qımylyn aldyn ala boljaý qıyn, buǵan qarsy shabýyl faktoryn qosyńyz. Keshe ǵana qosymsha mınýttarda eki gol soǵyp, Germanııany chempıonattan shyǵaryp jibergen Ońtústik Koreıa osy qarsy shabýyl arqyly jeńiske jetken bolatyn. Jalpy, bıylǵy chempıonat osyndaı sensatsııalarymen erekshelenip jatyr. Búgingi oıynda da eshkim kútpegen nátıje bolýy ábden múmkin.
Oıyn Samaradaǵy «Samara Arena» stadıonynda bolady. Qazsport telearnasy oıynnyń tikeleı translıatsııasyn Astana ýaqytymen 20:00-den bastap kórsetedi.
