ÁCh-2018: Meksıka joldamaǵa jaqyn qaldy
ASTANA. QazAqparat - Búgin Reseıdiń Dondaǵy Rostov qalasynda fýtboldan álem birinshiligi toptyq kezeńinde F tobyndaǵy Meksıka jáne Ońtústik Koreıa quramalary kezdesti, dep habarlaıdy QazAqparat tilshisi.
Meksıka bıylǵy birinshilikti óte sátti bastady. Alǵashqy týrda azýly Germanııany orta jolda qaldyrdy. Esep 1:0 . Ashyǵyn aıtqanda, olardan mundaı batyldyqty eshkim kúte qoıǵan joq edi. Mamandar men jankúıerler jeńisti nemisterge berip qoıǵan. Oǵan syr bergen meksıkalyqtar joq. Ózderiniń kózdegen maqsatyna jetti. Myqty qarsylasyn tize búktirip, týrnır kestesindegi jaǵdaıyn túzep aldy. Sondyqtan olar úshin koreılermen oıyn kóp nárseni sheshetin.
Jeńiske jetken jaǵdaıda jarystyń kelesi satysyna beriletin joldamany qaltaǵa basatyn. Sol degenine jetti.
Oıyn meksıkalyqtar shabýylymen bastaldy. Kezdesýdiń 25-mınýtynda Ońtústik Koreıa qaqpasyna penaltı belgilendi. Koreı fýtbolshy Chjan Hen Sý óz aıyp alańynda qolmen oınady degen jeleýmen serbııalyq tóreshi Mılorad Majıch 11-metrlikti nusqady. Bul múmkindikti meksıkalyq shabýylshy Karlos Vela múlt jibergen joq. Esep 1:0. Meksıka alǵa shyqty.
Budan keıin koreıler de birshama qaýipti sátter uıymdastyrdy. Koreılik fýtbolshy Son Hyn Mınniń esepti teńestiretin múmkindigi bolǵan. Degenmen ol mergendik tanyta almady. Esep ózgergen joq.
Son Hyn Mın budan keıin de meksıkalyqtar qaqpasy mańynda jıi kórindi. Oǵan qarsylas qurama qorǵaýshylary laıyqty tótep bere bildi.
Birinshi kezeń 1:0 esebimen Meksıka quramasynyń jeńisimen aıaqtaldy.
Ekinshi kezeń qos quramanyń alma-kezek shabýylymen bastaldy. Alaıda Meksıka quramasynyń basymdyǵy ańǵarylyp turdy. Meksıkalyq shabýylshy Haver Ernandes 66-mınýtta esepti ústemeledi.
Jankúıer qaýymnyń arasynda Chıcharıto degen laqap atpen de belgili fýtbolshy koreıler qaqpasy aldynda sol qanattan shabýyl jasady. Qaqpa aldynda koreı qorǵaýshysyn ońaı aldap ótti. Qaqpanyń ashyq tusyna dopty baǵyttady. Osylaısha óz golyn soqty. Esep 2:0.
93-mınýtta koreı jigiti Son Hyn Mın esepti qysqartty. Qorytyndy esep 2:1. Meksıka kezekti jeńisine jetti.
Alǵashqy týrda Ońtústik Koreıa Shvetsııadan 0:1 esebimen jeńildi. Sondyqtan eki oıynda da jeńilgen olar eline erterek qaıtýǵa májbúr boldy.
Búgin osy toptaǵy Germanııa men Shvetsııa («Qazaqstan». 00.00) oıyndary bolady. Sondaı-aq, búgin G tobynda Belgııa Týnısti 5:2 esebimen oısyrata jeńdi.
Bul toptaǵy kelesi týr 27 maýsymda ótedi. Sol kúni Meksıka men Shvetsııa, Ońtústik Koreıa men Germanııa kezdesedi.
