ÁCh-2018: Meksıka men Ońtústik Koreıanyń qaısysy jeńimpaz atanady
ASTANA. QazAqparat - Búgin Reseıdegi Dondaǵy Rostov qalasynda fýtboldan álem birinshiliginiń toptyq kezeńinde Ońtústik Koreıa men Meksıka quramalary kezdesedi. Bul - F tobyndaǵy ekinshi týrdyń alǵashqy oıyny, dep habarlaıdy QazAqparat tilshisi.
Alǵashqy týrda Meksıka quramasy aıdy aspanǵa bir-aq shyǵardy. Germanııany 1:0 esebimen jeńip, álem jankúıerleri aldynda úlken abyroıǵa keneldi. Negizinde atalmysh kezdesýde mamandar jeńis nemister enshisine jazylady degen pikirde bolǵan edi. Bul pikirmen meksıkalyq fýtbolshylar kelisken joq. Azýly qarsylasyna laıyqty deńgeıde tótep berdi. Olardyń qaqpasynan sańylaý taýyp, alǵashqy úsh upaıyna qol jetkizdi. Endi sol jeńisti jolyn jalǵastyra ala ma? Ońtústik Koreıa quramasymen oıynǵa daıyndyq barysy qalaı?
Bıylǵy álem birinshiligindegi tusaýkeser oıynyn Ońtústik Koreıa sátti bastady dep aıta almaımyz. Olar Shvetsııaǵa 0:1 esebimen jol berdi. Sol ketken esemizdi ekinshi týrda qaıtaramyz dep tastúıin bekinip otyrǵan jaıy bar. Sondyqtan Meksıkamen kezdesýde tartysty bolady degen senim zor. Ońtústik Koreıa bul joly jeńilgen jaǵdaıda erterek eline qaıtatyn quramalar qataryna qosylady.
Eki qurama buǵan deıin 13 márte kezdesken eken. Ózara tartysta Meksıka tarazyny basyp tur. Atstek eliniń ókilderi 6 márte jeńiske jetti. Koreı jigitteri 4 márte myqtylyǵyn dáleldedi. Al 2 oıynda qos qarsylas teń nátıjege qanaǵat bildirdi. Alǵash ret olar 1948 jyldyń 2 tamyzynda Anglııa astanasy - London qalasynda Olımpıada oıyndarynda jasyl alańǵa shyǵyp, onda Ońtústik Koreıa Meksıkany 5:3 esebimen tize búktirdi. Odan keıingi tórt oıynda meksıkalyqtar jeńiske jetti. 1993 jyly Ońtústik Koreıada ótken Prezıdent kýbogynda koreıler atalmysh qarsylasyn 4:0 esebimen oısyrata jeńdi. Jalpy alǵanda, Meksıka koreılerge 23 dop soqsa, olardan óz qaqpasyna 18 dop jiberip aldy. Eki qurama 1998 jylǵy álem birinshiliginde E tobynda kezdesken edi. Ol joly Meksıka 3:1 esebimen basym túsken edi.
Búgingi kezdesýden qos qurama da úlken úmit kútedi. Meksıka jeńse, jarystyń kelesi satysyna shyǵýǵa joldama alady. Ońtústik Koreıa úsh upaıdy oljalasa, ol da jarysty jalǵastyrý múmkindiginen ajyraı qoımaıdy.
Ońtústik Koreıa quramynda jaraqat alǵan oıynshylar bar. Qorǵaýshy Pak Chjý Ho endi bul birinshilikte óz quramasyna kómek qolyn soza almaıdy. Al FIFA Meksıka fýtbol federatsııasyna qurama jankúıerleriniń Germanııamen oıynnan keıingi jónsiz áreketteri úshin 10 myń AQSh dollary shamasynda aıyppul saldy.
Bul oıyn búgin 21.00-de bastalady. Kezdesý «Qazaqstan» arnasynan tikeleı efırde kórsetiledi. Sondaı-aq, búgin F tobyndaǵy Germanııa men Shvetsııa («Qazaqstan». 00.00) kezdesýi bolady. Al G tobyndaǵy Belgııa men Týnıs («Qazsport». 18.00) kezdesedi.
