ÁCh-2018: Marokkonyń avtogoly Iranǵa jeńis syılady

Iran Azııa qurlyǵy quramalary arasynda álem birinshiliginde upaıǵa alǵash qol jetkizýimen erekshelenedi. 1978 jyly parsylar Shotlandııamen 1:1 esebimen teń oınap, qalǵan eki kezdesýde Gollandııa men Perýge ese jiberdi. Arada 20 jyl ótkende olar óz tarıhynda tuńǵysh ret jeńiske qol jetkizdi. Sol jylǵy Frantsııa tórinde ótken dúbirli dodada parsylar AQSh quramasymen bir topqa tústi. Sol tusta qos memlekettiń arasynda qyrǵı-qabaq saıası shıelinis oryn alyp jatqan edi. Bul kezdesýde parsylar 2:1 esebimen jeńiske jetip, óz eline kól-kósir qýanysh syılady.

Iran quramasy bıylǵy birinshilikpen qosa eseptegende besinshi márte aıtýly alamanda baq synap otyr. Onyń eshbirinde toptyq kezeńnen asa alǵan joq. Iran álemdik birinshilikte álsiz sanalǵanymen Azııa qurlyǵynda qatarynan úsh márte chempıon atanǵan. 2018 jylǵy dop dodasyna irikteý kezeńinde olar óz tobynda birinshi oryn aldy.  

Marokko da bıyl besinshi márte bedeldi básekege kelip otyr. Jalpy, marokkolyqtar alǵash ret 1970 jyly jarystyń osy satysynda baq synaǵan edi. Sol jyly óz tobynda tórtinshi oryndy mise tutsa, 1986 jyly óz tobynda Anglııa, Polsha jáne Portýgalııa sekildi quramalardy artqa tastady. Jarystyń 1/8 kezeńinde FRG quramasynan 0:1 esebimen jeńilip eline qaıtty. Al 1994 jáne 1998 jyldardaǵy álem birinshilikterine kelgenimen qorjyny bos qaıtty. Sodan keıin 20 jyl boıy irikteý kezeńinen árige asa alǵan joq.

Bul topta Portýgalııa jáne Ispanııa quramalary da synǵa túsedi. Sondyqtan mamandar alǵashqy eki oryndy eýropalyq quramalar enshisine buıyrady degen joramal aıtyp otyr. Áıtse de, ony birinshilik barysy kórsetedi. Óıtkeni, dúbirli doda tarıhynda álsiz dep baǵalanǵan talaı qurama aıdy aspanǵa bir-aq shyǵarǵan edi. Sol sebepti Iran da, Marokko da eshkimge des bere qoımas.  

Atap óterligi, qos qurama buǵan deıin birde-bir márte ózara kezdesip kórgen joq. Oıyn bastalǵannan keıin tizgindi Marokko quramasy óz qolyna alýǵa tyrysty. Iran qaqpasy aldynda olardyń basymdyǵy baıqalyp turdy. Arasynda parsy fýtbolshylary da shabýylǵa shyqqanymen odan eshqandaı paıda kele qoıǵan joq. Olarǵa marokkolyq qorǵaýshylar tótep bere bildi. Negizinde Marokkonyń basymdyǵy aıqyn ańǵaryldy. Afrıkalyqtar Iran qaqpasy aýmaǵynda emin-erkin qımyl kórsetti. Alǵashqy kezeńniń sońyna taman ırandyqtar birneshe qaýipti sátterdi uıymdastyrdy. Oıynda marokkolyq Azız Býhaddýzdyń óz qaqpasyna soǵyp alǵan avtogoly sheshti. Esep 1:0. Iran jeńiske jetti.

Bul topta búgin taǵy bir kezdesý bolady. Sochı qalasyndaǵy «Fısht» stadıonynda Portýgalııa men Ispanııa quramalary kezdesedi. Oıyn 00.00-de bastalady.  

Bul toptaǵy kelesi oıyn 20 maýsymda ótkiziledi. Sol kúni Portýgalııa men Marokko, Iran men Ispanııa sheberlik baıqasady.