ÁCh-2018: Ispanııa men Portýgalııa teń tústi
ASTANA. QazAqparat - Fýtboldan 2018 jylǵy Álem chempıonatynda V tobynyń alǵashqy týr oıyndary qorytyndylandy, dep xabarlaıdyQazAqparat tilshisi.
Bıylǵy mýndıaldyń naǵyz tartysty oıynyna endi kýá boldyq. Portýgalııa men Ispanııa quramalary fýtbol jankúıerlerine esten ketpes qyzyqty match syılady. Eń alǵash qaýipti shabýyl kezinde Krıshtıaný Ronaldýǵa qarsy Nacho Fernandes ereje buzǵandyqtan, ıspanııalyqtar qaqpasyna 11 metrlik aıyp doby belgilendi. Ony 4-mınýtta komanda kapıtany Ronaldý qaltqysyz oryndap, esep ashty.
Tynymsyz shabýyldaǵan Ispanııa qarsy shabýyldan taǵy da gol jiberip alýy múmkin edi. Alaıda Dıego Kosta, araǵa jıyrma mınýt salyp, 24-mınýtta eki ortalyq qorǵaýshynyń qorshaýynan sytyla berip, oń aıaǵymen qaqpanyń oń jaq tómengi buryshyna kúshti soqqy baǵyttap esepti teńestirdi.
Kelesi jıyrma mınýttyq arpalystan keıin Krıshtıaný Ronaldý taǵy da komandasyn alǵa bastady. Ol aıyp alańy syzyǵynan kenet soqqy berip, De Heany sastyrdy. Qolaısyz traektorııamen kelgen dopty qaqpashy qaıtara almaı qaldy - 2:1. Komandalar úziliske osylaı ketti.
55-mınýtta Dıego Kosta Serdjı Býsketstiń pasynan keıin taǵy da esepti teńestirdi. Nebári úsh mınýt óter-ótpeste Nacho aıyp alańynan serpilip shyǵa bergen dopty aıyp alańynyń syrtynan oń aıaǵynyń syrtqy tobyǵymen shıyra teýip, týrnırdiń eń keremet golyn (ázirge) soqty.
Portýgalııa oıynnyń sońyna deıin esepti teńestirý úshin bar kúshin jumsady. Ispanııanyń orta shebi tyǵyz bolǵandyqtan, bul tustan jaryp ótý múmkin emes edi. Portýgalııalyqtar sol sebepti eki qanattan ortaǵa oıysqan josparly shabýyldaryn údete tústi. Sondaı shabýyldardyń birinde Ronaldýǵa qarsy taǵy da ereje buzylyp, aıyp doby belgilendi. 88-mınýtta Krıshtıaný sol aıyp dobyn keremet oryndap, týrnırdiń alǵashqy het-trıginiń ıesi atandy.
Komandalar osylaısha 3:3 esebimen tarqasyp, bir-bir upaıdan bólisip aldy.
