ÁCh-2018: Ispanııa 1/8 fınal aıasynda negizgi ýaqytta Reseıdi jeńe almady
ASTANA. QazAqparat - Búgin Reseı jasyl alańdarynda ótip jatqan 2018 jylǵy Álem chempıonatynyń 1/8 fınaly aıasynda Máskeýdiń «Lýjnıkı» stadıonynda Ispanııa jáne Reseı quramalary oınap jatyr. Kezdesýdiń negizgi ýaqytynda teń nátıjeler tirkeldi, dep habarlaıdy QazAqparat tilshisi.
Oıyn aldynan Ispanııa favorıt retinde kórsetilgen bolatyn. Biraq chempıonat qojaıyndary olarǵa tabandy qarsylyq kórsete aldy. 12-mınýtta pıreneılikter aıyp dobyn oryndaǵannan soń esep ashyldy. Sergeı Ignashevıchtiń aıaǵynan serpilgen dop kútpegende qaqpaǵa baǵyt alyp, Igor Akınfeevti qapy qaldyrdy. Jyldam goldan keıin, dopty ıspandar kóbirek ustaǵandyqtan, oıynnyń qarqyny birshama báseńdegendeı boldy. 41-mınýtta reseılikter buryshtamadan keıin esepti teńestirdi. Ispanııa quramasynyń ortalyq qorǵaýshysy Pıkeniń qolyna dop tıgendikten, penaltı belgilendi. Artem Dzıýba on bir metrlik núkteden múlt ketken joq - 1:1.
Ekinshi taımda Ispanııa búkil alańda ústemdik ornatty. Taım sońǵy mınýtynda dopqa ıelik etý kórsetkishi 78/22 paıyz, al qaqpaǵa baǵyttalǵan soqqylar kórsetkishi 8:0 bolǵany da osyny rastasa kerek. Alaıda eshbir komandaǵa oıynnyń negizgi ýaqytynda jeńis golyn soǵýdyń sáti túsken joq.
Gollandııalyq tóreshi Bern Kıýıpers komandalardy úziliske shaqyrdy. Endi oıyn taǵdyryn 15 mınýttan eki ekstra taım nemese penaltıler serııasy sheshetin boldy.
Aıta keteıik, osy oıynnyń jeńimpazy shırek fınalda Horvatııa - Danııa oıynynda jeńiske jetken komandamen kezdesedi.
