ÁCh-2018: Horvatııa Nıgerııany avtogol jáne penaltımen utty

Jankúıerler 16 maýsym kúni Álem chempıonaty aıasyndaǵy birden tórt oıyndy tamashalady. Dál osy kúni S jáne D toptaryndaǵy quramalar dop dodasyndaǵy alǵashqy kezdesýlerin ótkizdi. Eń sońǵy oıyn Horvatııa men Nıgerııa arasynda órbidi.

Mamandar bul toptaǵy quramalardy kileń myqtylar bas qosqan dep baǵalap otyr. Talaı talantqa jol ashqan Argentına jaıynda qaıtalap aıtý artyq. 1998 jyldan beri álem birinshiligi fınaldyq kezeńiniń turaqty qatysýshysy bolyp júrgen Horvatııany da álsiz dep aıta almaısyz. Qaı kezdesýinde de qarsylasynan qaımyqpaıtyn Nıgerııadan da kútetin úmit úlken. Sońǵy jyldarda talaıdy tańdaı qaqtyryp júrgen Islandııa da eshkimge upaı úlestire qoımaıdy. Sol sebepti árbir qurama úshin toptaǵy kez-kelgen kezdesýge tas-túıin daıyn shyǵý talap etiledi.

Horvatııa men Nıgerııa buǵan deıin birde-bir márte kezdesip kórgen joq. Sondyqtan alǵashqy kezdesýinde ekeýi de ózderiniń myqtylyǵyn dáleldeýge tyrysty. Reseıdiń Kalınıngrad qalasyndaǵy stadıonda bas tóreshi qyzmetin brazılııalyq Sandro Rıkkı atqardy.

Oıynnyń alǵashqy mınýtynan horvattar oıyn tizginin qolǵa alýǵa tyrysty. Nıgerııa qaqpasyna birneshe qaýipti sát uıymdastyrǵan. Alaıda, onyń eshbiri qaqpaǵa daryǵan joq. Kezdesýdiń alǵashqy goly 32-mınýtta soǵyldy. Ony nıgerııalyq shabýylshy Odjenekaro Etebo óz qaqpasyna soǵyp aldy. Horvatııalyq Lýka Modrıch oń qanattan buryshtama dobyn áýelete bergen edi. Bul dopty aldymen Ante Rebıch baspen qaqpaǵa baǵyttaǵan edi. Oǵan jolaı Marıo Mandjýkıch te qosyldy. Qaqpaǵa baǵyt alǵan dop nıgerııalyq fýtbolshy Odjenekaro Etebonyń aıaǵyna tıip, óz baǵytyn ózgertti. Sonyń saldarynan Nıgerııa quramasynyń qaqpashysy  Frensıs Ýzoho  dopty kóziniń qıyǵymen ǵana qaraýǵa májbúr boldy. Budan keıin de birneshe qaýipti sátter kezdesti. Olardyń eshqaısysy eki quramaǵa da óz paıdasyn alyp kelgen joq. Oıynnyń birinshi kezeńi 1:0 esebimen horvattar paıdasyna jazyldy.  

Ekinshi kezeń bastalǵan sátten nıgerııalyq fýtbolshylar shabýyl shebin kúsheıtýge tyrysty. Birshama ýaqyt Eýropa qurlyǵy ókilderi qorǵanysqa kóńil bólýge májbúr boldy. Horvattar esepti 71-mınýtta eseleı tústi. Bul sátte oıynnyń bas tóreshisi brazılııalyq Sandro Rıkkı nıgerııalyqtar qaqpasyna 11 metrlik aıyp dobyn belgiledi. Ony Lýka Modrıch múltiksiz oryndady. Esep 2:0. Budan keıin horvat quramasy qarqynyn kúsheıtti. Nıgerııa qorǵanysta senimdi oınady.

Esterińizge sala ketelik, bul toptaǵy Argentına men Islandııa quramalary arasyndaǵy kezdesý 1:1 esebimen teń aıaqtaldy. 

Atalmysh jeńisten keıin Horvatııa D tobynda kósh bastasa, Nıgerııa sońǵy orynǵa syrǵydy. Al ekinshi-úshinshi oryndardy Argentına men Islandııa ózara bólisip tur.

Bul toptaǵy kelesi oıyn 21 jáne 22 maýsym kúnderi ótkiziledi. Bir kún buryn Argentına men Horvatııa kezdesse, kelesi kúni Islandııa men Nıgerııa sheberlik baıqasady.  

Búgin, 17 maýsymda E tobynda Kosta-Rıka men Serbııa  (Qazsport. 18.00), Germanııa men Meksıka («Qazaqstan». 22.00) jáne F tobynda Brazılııa men Shveıtsarııa («Qazaqstan». 00.00) quramalary kezdesedi.

Týrnır oıyndarynyń tolyq kestesin myna jerden kórýge bolady.