ÁCh-2018: Horvatııa 20 jyl burynǵy jetistigin qaıtalaı ala ma?
ASTANA. QazAqparat - Fýtboldan álem birinshiligindegi búgingi oıyndar tizbegin D tobyndaǵy Horvatııa men Nıgerııa quramalary túıindeıdi. Bul oıyn túngi 00.00-de Kalınıngrad qalasynda jalaýyn kóteredi, dep habarlaıdy QazAqparat tilshisi.
Qos qurama da jankúıer qaýymyna jaqsy tanys. Aldymen Horvatııa jaıynda aıta ketelik. Olar álem birinshiligi fınaldyq kezeńine alǵash ret 1998 jyly keldi. Talaı talantty toǵystyrǵan qurama birden-aq júldegerler qatarynan kórinip, úzdik úshtikke ilikti. Degenmen Eýropa birinshiliginde mundaı jetistigimen maqtana almaıdy. 1998, 2008 jyldary shırek fınalǵa deıin jetti. Odan joǵary jetistikti ázirge baǵyndyra alǵan joq. 2018 jylǵy álem birinshiligine irikteý kezeńinde qıyn topqa tústi. Bul topta ózderi deńgeıles Ýkraına, Túrkııa sekildi quramalardy artqa qaldyrdy. Topta ekinshi oryn aldy. Aldyńǵy orynda sońǵy jyldarda jankúıerler seniminen shyǵyp júrgen Islandııa tur. Óz tobynda ekinshi oryn alǵan Horvatııa Grekııamen pleı-off kezeńinde synǵa tústi. Syrt alańda olarmen teń oınaǵan horvattar óz alańynda Grekııany 4:0 esebimen tas-talqan etip utty. Osylaısha joldamany sońǵy sátte qaltaǵa saldy. Qurama sapynda Madrıdtiń «Realynda» oınaıtyn 32 jastaǵy Lýka Modrıch jáne «Barselonanyń» úzdigi 30 jasar Ivan Rakıtıch bar. Olardan ózge de Eýropanyń aldyńǵy qatarly klýbtarynda dop tebetin myqtylar az emes. FIFA jarııalaǵan sońǵy reıtıngte Horvatııa 20-orynda tur.
Budan burynǵy álem birinshilikterinde talaı márte sensatsııa jasap úlgergen Nıgerııaǵa da jankúıerler kóz tigip otyr. Afrıka qurlyǵynyń ókilderi búginge deıin 5 márte dúbirli dodanyń osy kezeńine kelgen. Olar 1994, 1998, 2014 jyldary jarystyń 1/8 fınalyna deıin jetti. Afrıka kýbogynda 17 márte baq synaǵan 1980, 1994, 2013 jyldary chempıondyq ataqqa qol jetkizgen. 1998 jyly jazǵy Olımpıada oıyndarynda talaıdy tańǵaldyryp, altynnan alqa taqty. Osylaısha Afrıka quramalary arasynda mundaı tabysqa jetken tuńǵysh qurama boldy. 2018 jylǵy álem birinshiligi fınaldyq kezeńine joldama alý olar úshin qıynǵa soqqan joq. Birde-bir márte jeńilis tappaǵan kúıi Zambııa, Kamerýn, Aljırdi artqa qaldyryp ketti. Mamandar Nıgerııanyń kóshbasshy oıynshysy retinde 31-jastaǵy Djon Obı Mıkeldi aıtady. Uzaq jyldar boıy Anglııanyń «Chelsı» komandasy jeıdesin kıgen fýtbolshy búginde Qytaıdyń «Tıantszın Teda» klýbynyń namysyn qorǵaıdy. Nıgerııa FIFA-nyń sońǵy reıtınginde 48-orynda keledi.
Bul kezdesý búgin «Qazaqstan» telearnasynan kórsetiledi. Oıyn 01.00-de bastalady.
