ÁCh-2018: Garrı Keınniń úsh goly Anglııany jeńiske jeteledi
ASTANA. QazAqparat - Búgin fýtboldan álem birinshiliginiń toptyq kezeńindegi ekinshi týr máresine jetedi. Bul kúni G jáne N tobynda oıyndar ótedi. Osy kúngi oıyndardyń alǵashqysy Anglııa men Panama arasynda boldy, dep habarlaıdy QazAqparat tilshisi.
Atalmysh kezdesý jaıynda biz budan buryn «Anglııa quramasy Panamany jeńe ala ma» degen oıymyzdy bildirgen edik. Kezdesýdiń eki qurama úshin de mańyzy zor boldy. Aǵylshyndar joldamaǵa erterek qol jetkizý maqsatynda jantalasty. Panama da dop dodasyna bekerden-beker kelmegenin dáleldegisi kelse, osy joly ózderine qajetti nátıjege qol jetkizýi tıis edi. Qarsylasynyń ataǵy men abyroıyna qaramastan úsh upaı oljalap jatsa, týrnır kestesindegi jaǵdaıyn jaqsartary sózsiz. Buǵan deıin Panama 11 eýropalyq quramamen kezdesken eken. Olardyń barlyǵynda jeńilgen. Kezdesýge mysyrlyq tóreshi Gead Grısha qazylyq etti.
Bul oıynǵa Dele Allı qatysa almady. Ol Týnıspen kezdesýinde jaraqat alyp qalǵan edi.
Reseıdiń Nıjnıı Novgorod qalasyndaǵy stadıonda ótken oıyn aǵylshyndar shabýylymen bastaldy. Kózdegen maqsatyna olar kóp uzamaı-aq jetti. Anglııa alǵashqy golyn 8-mınýtta soqty. Goldy aǵylshyn qorǵaýshysy Djon Stoýns óziniń enshisine jazdy. Aǵylshyn shabýylshysy Garrı Keın óziniń golyn 19-mınýtta soqty. Bul joly penaltıdi múltiksiz oryndap, esep aıyrmasyn ulǵaıta tústi.
Búginge deıin Garrı Keın ulttyq qurama sapynda 26 oıyn ótkizip, óziniń enshisine 16 goldy jazyp otyr. Oıynnyń 35-mınýtynda tablo 3:0 esebin kórsetip turdy. Aǵylshyndar sapynan goldy Djessı Lıngardtyń qanjyǵasy maılandy. Al Djon Stoýns dýbl jasap úlgerdi. Esep 4:0. Alǵashqy kezeń aıaqtalar tusta aǵylshyndar besinshi golyn engizdi. Ony Garrı Keın 11-metrlikten soqty. Esep 5:0.
Oıynnyń ekinshi kezeńi de aǵylshyndar basymdyǵymen ótti. Panamalyqtar dop aıyrmasyn qysqartýǵa jantalasqanymen odan eshqandaı paıda kelmeı jatty. Esesine 62-mınýtta Garrı Keın het-trıktiń avtory atanyp, surmergender tiziminde portýgaldyq Krıshtıaný Ronaldý men Romelo Lýkakýdy artqa qaldyryp ketti.
Panama óz eline qur qol qaıtýdy qup kórmegen sekildi. Felıpe Baloı 78-mınýtta esep aıyrmasyn qysqartty. Ol Panamanyń álem birinshiliginiń fınaldyq kezeńindegi tuńǵysh golynyń avtory atandy. Esep 6:1. Anglııa alda.
Bul toptaǵy sońǵy týr oıyndary 28 maýsym kúnderi bolady. Sol kúni Anglııa men Belgııa, Panama men Týnıs ózara kezdesedi.
Búgingi kúnge deıin álem birinshiligindegi eń iri jeńilis 1982 jyldyń Majarstan men Salvador arasynda tirkelip, bul joly eýropalyqtar 10:1 eesbimen jeńiske jetken edi. Sondaı-aq, 1954 jyly Majarstan Ońtústik Koreıany, 1974 jyly ıÝgoslavııa Zaırdi 9:0 esebimen jeńgen edi.
Sondaı-aq, búgin N tobyndaǵy Japonııa men Senegal («Qazaqstan». 21.00), Polsha men Kolýmbııa («Qazaqstan». 00.00) quramalary kezdesedi. Osymen álem birinshiliginiń ekinshi týr oıyndary túıindeledi.
