ÁCh - 2018: Frantsııa tartysty matchta Aýstralııany utty
ORAL. QazAqparat - Fýtboldan álem chempıonatynyń Qazan qalasynda ótken kezekti oıynynda Frantsııa men Aýstralııa komandalary kúsh synasty, dep habarlaıdy QazAqparat tilshisi.
Budan jıyrma jyl buryn Zınedın Zıdan bastaǵan frantsýzdar álem chempıony atanǵany belgili. 2006 jyly fınaldyq matchta ıtalıandyq qorǵaýshy Marko Materatstsıdi baspen soǵyp, Zıdan alańnan qýylǵannan keıin frantsýzdar oıynnan keıingi 11 metrlik serııada utylyp, kúmis júldeni qanaǵat tutqan edi.
Qazir Frantsııa quramynda Zınedın Zıdandaı uly oıynshy bolmaǵanymen, Pol Pogba, Antýan Grızmann, Kılıan Mbappe sııaqty atynan at úrketin myqtylar jetkilikti. Sondyqtan 1998 jylǵy álem chempıony Dıde Desham shákirtteriniń bıylǵy birinshilik favorıtteriniń biri sanalýy ábden zańdy.
Aýstralııamen ótken match ta frantsýzdardyń shabýylymen bastaldy. Alǵashqy alty mınýttyń ózinde olar qaqpaǵa úsh birdeı soqqy jasap úlgerdi. Bul sátterde Aýstralııa qaqpashysy Metıý Raıan senimdi oınady. Aýstralııalyqtar frantsýzdardyń ushqyr qımylyna ilese almaı, oıyn tártibin jıi buzýǵa májbúr bolyp jatty. Degenmen olar da 12-mınýtta aıyp dobyn oryndaı aldy. 17-mınýtta sondaı standarttyq jaǵdaıdan keıin Frantsııa qaqpashysy Ýgo Lorıs asa qaýipti soqqyny qaıtara bildi.
Ekinshi taımda Pol Pogbanyń pasynan keıin aıyp alańyna ene bergen A.Grızmandy aýstralııalyq qorǵaýshy shalyp qulatty. Ýrýgvaılyq tóreshi Andres Kýnıa bastapqyda oıyndy jalǵastyrýǵa belgi bergenimen, beıneqaıtalaýdy qarap shyqqannan keıin 11 metrlik penaltıdi belgiledi. Osylaısha 58-mınýtta Grızmann aıyp núktesinen múlt ketken joq - 1:0.
Arada úsh mınýt óter-ótpeste standartty jaǵdaıdan keıin frantsııalyq qorǵaýshy Samıýel Ýmtıtı óz aıyp alańynda qolmen oınap qoıdy. Bul joly 11 metrlik penaltıdi aýstralııalyq Mıle Edınak dál oryndady.
Match bitýge 20 mınýttaı qalǵanda, D.Desham shabýyl shebin kúsheıtý maqsatynda A.Grızmann men Ýsman Dembeleniń ornyna Olıve Jırý men Nabıl Fekırdi shyǵardy. 81-mınýtta P.Pogbanyń soqqysynan keıin dop qaqpa mańdaıshasyna tıip, ishine enip, qaıta shyqty. Muny goldy avtomatty túrde esepteý júıesi dál kórsetti - 2:1.
Kezdesý sońyna taman aýstralııalyqtar qarqyndy kúsheıtkenimen, frantsýzdar jeńisti saqtap qala aldy.
Bul oıyn álem chempıonatynda kez kelgen qarsylasty qalpaqpen uryp alýǵa bolmaıtyndyǵyn, qaı komandanyń da favorıttermen taıtalasa alatyndyǵyn kórsetti.
Eske sala keteıik, S tobynda sondaı-aq Perý men Danııa komandalary da oınaıdy. Ár toptan úzdik atanǵan qos qurama pleı-off kezeńine ótedi.
