ÁCh-2018: Frantsııa men Perý 36 jyldan keıin qaıta kezdesedi
ASTANA. QazAqparat - Fýtboldan álem birinshiligi fınaldyq kezeńiniń búgingi jarys shymyldyǵyn S tobyndaǵy Frantsııa men Perý quramalary ashady. Bul kezdesý Perý quramasynyń jarysty jalǵastyrý múmkindigin anyqtaıtyn oıyn bolady, dep habarlaıdy QazAqparat tilshisi.
Mýndıalǵa 36 jyldan keıin qaıta oralǵan Perý quramasy Reseı jerinde ózderin jaqsy qyrynan tanytamyz degen ýádesin bergen edi. Alǵashqy týrda Danııamen kezdesýde oıyn taǵdyryn jalǵyz ǵana dop sheshti. Dat fýtbolshylary 1:0 esebimen jeńdi. Sol ketken esesin Frantsııamen oıynda qaıtara ala ma? Ony jasyl alań tórindegi báseke sheshedi. Frantsııa alǵashqy týrda Aýstralııany 2:1 esebimen jeńdi. Osylaısha týrnır kestesindegi jaǵdaıyn birshama túzep aldy. Joldama taǵdyryn olar ekinshi týrda sheship alýǵa qarsy emestigin bildirip otyr. Dıde Desham shákirtteri sol maqsatta tynbaı ter tógedi.
Qos qurama buǵan deıin eki márte kezdesti. Bir oıynda Frantsııa, bir oıynda Perý jeńiske jetti. Qyzyǵy, qos quramanyń sońǵy kezdesý osydan 36 jyl buryn ótken eken. 1982 jyldyń 28 sáýirinde Parıj qalasynda ótken joldastyq kezdesýde Ońtústik Amerıka qurlyǵynan kelgen fýtbolshylar 1:0 esebimen jeńiske jetken edi. Al qos qurama arasyndaǵy alǵashqy kezdesý odan 22 jyl buryn, dálirek aıtqanda, 1960 jyldyń 26 tamyzynda ótkizildi. Ol Olımpıada oıyndary bolatyn. Italııanyń Florentsııa qalasynda toptyq kezeń boıynsha ótken matchta frantsýzdar atalmysh qarsylastaryn 2:1 esebimen tize búktirdi. Qysqasy, búginge deıin qos qurama álem birinshiliginde kezdesip kórgen joq. Endeshe, atalmysh kezdesýdiń tarıhı máni zor.
Frantsııa men Perý FIFA reıtıngisinde qatarlas keledi. Frantsııa 7-orynda tursa, Perý 11-orynǵa ıe bolǵan. Degenmen ol quramalardyń áleýetin tolyq ańǵarta qoımasa kerek-ti.
Frantsýz bapkeri Dıde Desham: «Perýdiń shabýyl shebinde myqty oıynshylar bar. Olar jyldam qozǵalyp, kezdesý taǵdyryn sheship kete alady. Keıde olar shabýylǵa kóbirek kóńil bólip, qorǵanysty umyt qaldyryp jatady. Degenmen olar kóp jaǵdaıda qorǵanys shebinde senimdi oıyn kórsete alady», - dedi.
Perý quramasynyń bas bapkeri Rıkardo Gareka aldaǵy kezdesýde óz shákirtteriniń bar kúshin sala oınaıtynyn aıtty. Sondaı-aq, álem birnshiliginiń uıymdastyrý deńgeıi joǵary ekenin baǵalap ótti. «Men dop dodasynyń uıymdastyrý deńgeıine eshqandaı syn aıta almaımyn. Barlyǵy óz deńgeıinde bolyp jatyr», - dedi.
Bul oıyn búgin 21.00-de Ekaterınbýrg qalasyndaǵy stadıonda ótedi, Oıyn «Qazaqstan» ulttyq arnasynan tikeleı efırde kórsetiledi.
Sondaı-aq, búgin S tobynda Danııa men Aýstralııa («Qazsport». 18.00), D tobyndaǵy Argentına men Horvatııa quramalary («Qazaqstan». 00.00) kezdesedi.
