ÁCh-2018: Frantsııa men Danııa eki joldamaǵa ıe boldy
ASTANA. QazAqparat - Reseıde fýtboldan ótip jatqan álemdik dop dodasy qyza tústi. Búgin toptyq kezeńniń S tobyndaǵy quramalar úshinshi týr oıyndaryn ótkizdi. Máskeýdegi «Lýjnıkı» stadıonynda Frantsııa men Danııa quramalary ózara sheberlik baıqasty. Bul oıynda 0:0 esebi tirkeldi, dep habarlaıdy QazAqparat tilshisi.
Matchtyń negizinen Danııa quramasy úshin mańyzy zor boldy. Osy oıyn jóninde biz «Frantsııa baıyrǵy qarsylasynan basym túse ala ma» degen taqyrypta oıymyzdy bildirgen edik.
Olar alǵashqy eki týrda jeńilgen joq. Bir jeńis, bir teń oıynnyń arqasynda tórt upaı jınady. Frantsııa birinshi jáne ekinshi týrda baryn salyp, upaıdan shashaý shyǵarǵan joq. Qorjynǵa 6 upaı salyp, jarysty jalǵastyrý múmkindigine erterek qol jetkizdi. Danııalyqtar sońǵy kezdesýde jeńilip, osy toptaǵy Avstralııa sońǵy týrda Perýden basym tússe, jarysty jalǵastyra almaıtyn edi. Sol sebepti oıyn bastalǵannan keıin olar birden shabýyl shebine shyqty. Oıynǵa Frantsııa sapynda Mandanda, Varan, Sıdıbe, Lıýka Ernandes, Kımpembe, Nzonzı, Kante, Lemar, Dembele, Grızmann, Jırý sekildi jigitter shyqsa, Danııa quramasynda Shmeıhel, Krıstensen, Ker, Larsen, Iorgensen, Erıksen, Dıleını, Sısto, Dalsgor, Breıtýeıt, Kornelıýs boldy.
Aıta keteıik, Danııa quramynda ıÝssýf Poýlsen tizimge engen joq. Ol budan burynǵy oıyndar barysynda alǵan sary qaǵazdaryna oraı bul kezdesýge qatysý múmkindiginen aırylǵan bolatyn. Sondaı-aq Danııanyń jartylaı qorǵaýshysy Lasse Shene qosalqy quramda qaldy. Onyń ornyna Andreas Kornelıýs shyqty. Al Frantsııa quramynda kóptegen ózgeris boldy. Oǵan sebep te bar. Olar joldama taǵdyryn erterek sheship qoıdy. Sondyqtan toptyq kezeńdegi sońǵy oıynda basqa da fýtbolshylardyń sheberligin tarazyǵa tartýǵa nazar aýdardy. Atap aıtqanda, olardyń qatarynda negizgi quramda Stıv Mandanda, Djıbrıl Sıdıbe, Presnel Kımpembe, Toma Lemar syndy jigitter jasyl alańǵa shyqty.
Jankúıerler bul kezdesýden tartysty báseke kútken edi. Sol úmit aqtalǵandaı boldy. Qos qurama almakezek shabýylmen jankúıerdi jalyqtyra qoıǵan joq. Alǵashqy sátte frantsýzdar dopqa kóbirek ıelik ete bastady. Amalsyzdan dat fýtbolshylary qorǵanysqa sheginýge májbúr boldy. Áıtse de, olardyń tarapynan qarsy shabýyldar órbip jatty. Andreas Kornelıýsten alǵan tamasha múmkindigin Krıstıan Erıksen golǵa aınaldyra almady. Degenmen kezdesý barysynda Frantsııa quramasynyń basymdyǵy aıqyn ańǵarylyp turdy. Danııalyqtan dopqa ıelik etý jóninen 35 protsentke deıin tómendep ketkeni baıqaldy. Birinshi kezeńde qos qurama bir-birine gol soǵa almady. Ekinshi kezeńde de dál sol esep saqtaldy. Jarysty bul toptan Frantsııa men Danııa jalǵastyratyn boldy. Endi olar F tobyndaǵy eki úzdik quramamen jarystyń 1/8 fınalynda sheberlik baıqasady.
Sondaı-aq, búgin osy topta Perý men Avstralııa quramalary kezdesip, Perý 2:0 esebimen jeńiske jetti. Nátıjesinde úshinshi oryn Perýge buıyrdy.
Erteń, 27 maýsymda E jáne F toptaryndaǵy quramalar toptyq kezeńdegi úshinshi týr oıyndaryn ótkizedi. E tobynda Serbııa men Brazılııa («Qazaqstan». 00.00), Shveıtsarııa men Kosta-Rıka («Qazsport». 00.00) quramalary kezdesedi. Al F tobynda Meksıka men Shvetsııa («Qazsport». 20.00), Ońtústik Koreıa men Germanııa («Qazaqstan». 20.00) quramalary oınaıdy.
Ádiljan Úmbet
