ÁCh-2018: Frantsııa baıyrǵy qarsylasynan basym túse ala ma

Dıde Desham tálim beretin Frantsııa quramasynyń jampozdary alǵashqy eki týrda eshbir súringen joq. Qos qarsylasty da qapy qaldyrdy. Aldymen Avstralııany súrindirdi. Esep 2:1. Odan keıingi oıynda da kóp ter tókken joq. Perýge qaqpasyna jalqy gol soqsa da, úsh upaıdy qorjynǵa saldy. Esep 1:0. Al Danııa sál kibirtiktep qaldy. Áýeli Perýdi 1:0 esebimen jeńip, odan keıin Avstralııamen 1:1 esebimen teń tústi. Qazir dat fýtbolshylary topta ekinshi orynda tur. Eger búgin Frantsııa quramasynan jeńilip, Avstralııa Perýden basym tússe, joldamadan qaǵylýy ǵajap emes. Sol sebepti búgingi oıynnyń olar úshin mańyzy óte zor bolyp turǵan jaıy bar. Danııa quramasyna teń nátıje de jetkilikti. Olaı bolsa Danııa bes upaı jınaıdy. Osylaısha jasyl qurlyqtyń quramasy qýyp jete almaıdy. Al Frantsııany jeńip jatsa, toptyq kezeńde birinshi orynǵa kóteriledi. Sol sebepti bul kezdesý tartysty óterine kúmán joq sekildi.

Joramal jasaýshylar qalaı bás tigip otyr? Kóbisi Dıde Desham shákirtteri jeńiske jetedi degen úmitte eken. Ras, Frantsııa quramasynda bir ózi oıyn taǵdyryn sheship kete alatyn sańlaqtar barshylyq. Sondyqtan frantsýzdar kezdesýdiń basty favorıti sanalyp otyr. Danııa da qajet kezinde jınaqy oınaı alady. Soǵan qaraı otyryp olar jeńisti tekten-tekke bere qoımas degen úmit bar.

Frantsýzdardyń árbir dop dodasy saıyn qarqyny ósip keledi. 2014 jyly olar shırek fınalǵa deıin jetti. 2016 jyly Eýropa birinshiliginde aqtyq synǵa deıin bardy. Endeshe, olar bul joly odan joǵary tabysqa qol jetkizýi ǵajap emes. Bas bapker Dıde Desham Perýmen ótken oıynnan keıin «Biz árbir oıynda iri eseppen jeńe almaımyz. Endi bizge aldaǵy kezdesýge daıyndalý qajet. Onda jankúıer seniminen tabylýǵa tyrysamyz», - dedi.

Bir sózben aıtqanda, qos qurama da bir-birine jaqsy tanys. Olar bir-birimen 15 márte kezdesken eken. Onyń ishinde 8-de frantsýzdar qanjyǵasyn maılasa, 6-da danııalyqtar jeńis toıyn atap ótti. Al bir kezdesýde teń nátıje tirkeldi. Alǵash ret qos qurama 1908 jyly Olımpıada oıyndarynda kezdesken. Sol jyly dat fýtbolshylary 9:0 esebimen oısyrata jeńgen eken. Qos qurama álem birinshiliginiń fınaldyq satysyndaǵy toptyq kezeńde buǵan deıin eki márte synǵa túsken. 1998 jyly 24 maýsymda Lans qalasynda frantsýzdar bul qarsylasyn 2:1 esebimen tize búktirdi. 2002 jylǵy álem birinshiliginde olardyń joly taǵy da toptyq kezeńde túıisip, bul joly danııalyqtar 2:0 esebimen jeńiske jetti. Qos qurama sońǵy ret 2015 jyly joldastyq kezdesý ótkizgen. Bul joly frantsýzdardyń mereıi ústem boldy. Esep 2:1.

Bul kezdesý Reseıdiń Máskeý qalasyndaǵy «Lýjnıkı» stadıonynda ótedi. Oıyn «Qazaqstan» telearnasynan 20.00-de kórsetiledi.  S tobynda búgin taǵy bir oıyn Avstralııa men Perý («Qazsport». 20.00) quramalary arasynda ótedi. Sondaı-aq, búgin D tobynda Nıgerııa men Argentına («Qazaqstan».00.00), Islandııa men Horvatııa («Qazsport». 00.00) quramalary kezdesedi.