ÁCh-2018: Eń jas fýtbolshynyń goly frantsýzdarǵa jeńis ákeldi
ASTANA. QazAqparat - Búgin fýtboldan álem birinshiliginiń kezekti oıyny Ekaterınbýrg qalasyndaǵy stadıonda ótti. Munda «S» tobyndaǵy Frantsııa men Perý quramalary kezdesti, dep habarlaıdy QazAqparat tilshisi.
Tóreshiniń ysqyryǵy estilisimen Frantsııa fýtbolshylary jyldam shabýyldarǵa kóshti. Áýeli, «Manchester ıÝnaıted» úzdigi Pol Pogba Perý qaqpasyna alystan shirene tartty. Onyń soqqysy qaqpadan sál ǵana qıys ketti. Kelesi sátte Antýan Grızmann «sóz» aldy. Shabýylshy aıyp alańyna kirip baryp teýip úlgirgen. Alaıda, oǵan dáldik jetispedi. Matchtyń 30-mınýtynda oıda joqta Perý quramasy gol soǵyp ketýge shaq qaldy. Frantsýz qorǵaýshylaryn aldap ótken Gerrero urymtal tusqa shyǵyp, jerlete tepti. Biraq, qaqpashy ıÝgo Lorıs kerek jerden tabyldy. Іle-shala uıymdastyrylǵan qarymta shabýyl frantsýzdarǵa jemisin berdi. Shabýylshy Oılve Jırýdyń tepken doby qorǵaýshydan serpilip, Kıllıan Mbappeniń aıaǵyna dóp tústi. Al, Frantsııa quramasynyń sapyndaǵy eń jas oıynshy týrnırdegi óziniń birinshi golyn soqty. Osylaısha, 19 jastaǵy Mbappe ázirge Reseıdegi álem chempıonatynda sol soqqan eń jas oıynshy atandy. Jalpy, Kıllıan Mbappe avstralııalyq Danıel Arzanımen birge osy mýndıaldaǵy eń jas fýtbolshylar. Ekeýiniń de jasy 19-da.
Birinshi taımnyń sońyna taman A.Grızmannnan pas alǵan L.Ernandes esepti eseleıtin múmkindikti múlt jiberdi.
Kezdesýdiń ekinshi bóligi Perý aıaqdopshylarynyń basymdyǵymen bastaldy. Júıeli uıymdastyrylǵan shabýyldy Pedro Akıno joıqyn soqqymen aıaqtady. Onyń tepken doby qaqpa baǵanasyna tıip, aýtqa ketti. Munan soń frantsýzdar O.Jırý men Ý.Dembele gol soǵatyn múmkindikterin paıdalana almady. Oıyn sońyna qaraı Ońtústik amerıkalyqtardyń kapıtany R.Gerrero aıyp dobyn oryndaǵan. Alaıda, Frantsııa qaqpashysy bul soqqyǵa da toıtarys berdi.
Toqsan mınýt ta túgesildi. Sóıtip, osy álem chempıonatyndaǵy eń jas oıynshylardyń biri K.Mbappeniń goly Frantsııa quramasyna jeńis ákeldi. Sonymen qatar eýropalyqtar «S» tobynan kelesi aınalymǵa shyqqan alǵashqy ujym boldy.
