ÁCh-2018: Egıpet-Ýrýgvaı matchy taǵdyryn jalǵyz dop sheshti
ASTANA. QazAqparat - Fýtboldan álem birinshiligindegi ekinshi oıyn Egıpet jáne Ýrýgvaı quramalary arasynda ótti. Bul oıynda Ýrýgvaı Egıpetten 1:0 esebimen basym tústi, dep habarlaıdy QazAqparat tilshisi.
Eki qurama da dúbirli dodaǵa bostan bos kelgen joq. Ýrýgvaı álem birinshiligi fınaldyq kezeńiniń turaqty qatysýshy ekeni belgili. Ońtústik Amerıka qurlyǵynyń ókilderi 1930 jáne 1950 jyldarda álem chempıony ataǵyn jeńip alǵan. 1974-2006 jyldar aralyǵynda ótken 9 álem birinshiliginiń beseýinde Ýrýgvaı fınaldyq kezeńnen tys qaldy. 1986, 1990 jyldarda fınaldyq kezeńniń toptyq saıysynan ótken edi. Degenmen olar jarystyń 1/8 satysynan asa alǵan joq. 2010 jyly atalmysh qurama ózderin jaqsy qyrynan kórsetip, sol ýaqytta toptyq kezeńde frantsýz, meksıkalyq jáne ońtústikafrıkalyq quramalarmen sheberlik baıqasty. Jarystyń kelesi satylarynda Ońtústik Koreıa jáne Gana quramalaryn artta qaldyrdy. Bul jyly qurama tórtinshi orynnan kórindi. 2014 jyly ol jetistigin qaıtalaı alǵan joq. Ýrýgvaı qurama sapynda búginde esimi elge málim Lýıs Sýares, Edınson Kavanı syndy juldyzdar bar.
Qazir Egıpet te osal qurama emes. Olardyń sapynda Mohamed Salah esimdi juldyz óner kórsetedi. Bul qurama álem birinshiligine qatysý jóninen maqtana almaıdy. Afrıka qurlyǵynyń ókilderi mýndıalda bıylǵy kórsetkishimen qosa eseptegende bar-joǵy úshinshi márte baq synap otyr.
Qos qurama buǵan deıin 2006 jyldyń 16 tamyzynda kezdesken. Ol oıynda Ýrýgvaı 2:0 esebimen basym túsken edi. Reseıdiń Ekaterınbýrg qalasyndaǵy «Ekaterınbýrg Arena» stadıonynda ótken kezdesýde alǵashqy mınýttan ýrývaılyq Lýıs Sýares pen Edıson Kavanı jasyl alańǵa shyqty. Al Egıpet juldyzy Mohamed Salah oıynǵa qatysatyn fýtbolshylar tizimine engizilgen joq. Kezdesý barysynda Ýrýgvaı quramasy birneshe márte qarsylastar qaqpasyna qaýip tóndirdi. Degenmen olarǵa sáttilik jetispeı jatqany baıqaldy. Oıynnyń birinshi kezeńinde teń nátıje tirkeldi.
Ekinshi kezeńde de qos qurama alma-kezek shabýylǵa shyqty. Ýrýgvaı sapynan Lýıs Sýares pen Edınson Kavanı birneshe sátte múlt ketti. Oıynnyń 80-mınýttarynda Egıpet te Ońtústik Amerıkadan kelgen qarsylasynyń qaqpa mańynda gol soǵatyn múmkindikterin paıdalana alǵan joq.
Kezdesý taǵdyryn sheshken jalǵyz dop 89-mınýtta soǵyldy. Oń qanattan áýelete soǵylǵan dopty Hose Marııa Hımenes baspen Egıpet qaqpasyna baǵyttap, óz quramasyn alǵa shyǵardy.
A tobynda keshe, 13 maýsymda Reseı men Saýd Arabııasy kezdesip, alań ıeleri 5:0 esebimen basym túsken edi. Bul topta 19 maýsymda Reseı men Egıpet, 20 maýsymda Ýrýgvaı men Saýd Arabııasy oınaıdy. Búgin, V tobynda qos oıyn ótkiziledi. Astana ýaqytymen Iran-Marokko 21.00-de jasyl alańǵa shyqsa, 00.00-de Ispanııa-Portýgadııa quramalary myqtyny anyqtaıdy.
