ÁCh-2018: Egıpet quramasy Mohamed Salahsyz oınaı ma?
ASTANA. QazAqparat - Reseıde ótip jatqan fýtboldan álem birinshiliginiń A tobynda Egıpet pen Saýd Arabııasy kezdesedi. Qos qurama arasyndaǵy oıyn eshqandaı joldama taǵdyryn sheshpeıdi. Ózara tartysty básekede kimniń myqty, kimniń álsiz ekenin tarazylaıdy, - dep habarlaıdy QazAqparat tilshisi.
Jerebe tartylǵan sátte Egıpet óz tobynda ekinshi orynǵa ıe bolýy múmkin degen boljam aıtylǵan edi. Solaı bolarlyq jóni bar. Qurama sapynda Mohamed Salah sekildi juldyz bar. Búginde Anglııanyń «Lıverpýl» sapynda ter tógip júrgen ataqty fýtbolshy óz quramasyn órge súıreı me degen úmit zor boldy. Alaıda ol álemdik dodada ózin jaqsy qyrynan tanyta almady. Eki oıynda nebári bir ǵana dop soqty. Ýrýgvaı jáne Reseımen oıyndarda ony qarsylastary tusaýlap tastaǵandaı boldy. Adymyn jazyp, sheberligin kórsete almady. Bálkim, Saýd Arabııasymen kezdesýde kóp gol soǵar. Degenmen onyń eshbir paıdasy joq. Egıpet quramasy eline erterek qaıtatyn quramalar qataryna áldeqashan qosylyp qoıǵan.
SNN agenttigi oıyn aldynda Mohamed Salah jaıynda mynadaı jaǵymsyz aqparat taratty. Ol sońǵy oıynǵa qaramastan qurama sapynan ketedi eken. Kóp uzamaı ony qurama mamandary teriske shyǵardy. Egıpet quramasy baspasóz qyzmetiniń mamany Ýsama Ismaıl bul jaıynda «Onda turǵan eshteńe joq. Mohamed Salah quramanyń barlyq jattyǵýyna qatysty. Aldaǵy kezdesýge ázirligin jasaýda», - dedi.
Egıpet pen Saýd Arabııasy arasyndaǵy kezdesýde qaı qurama jeńiske jetedi? Árıne, mamandar osy oraıda Mohamed pen onyń serikterine úlken senim artatyny belgili. Quramada Mohamedten basqa da juldyzdar bar. Atap aıtqanda Anglııanyń «Arsenal» (London) komandasynda oınaıtyn Mohamed el-Nennı de jankúıer aldynda ózderin jaqsy qyrynan tanytýǵa tyrysady.
Saýd Arabııasy jóninde mamandar da oń pikirin bildiredi. Ras, quramada el tanıtyn juldyzdar joqtyń qasy. Dese de qurama álem birinshiliginde jaqsy oıyn kórsetýge tyrysty. Fızıkalyq turǵydan da daıyndyǵy jaman emes. Olarǵa tájirıbe jetpegen sekildi. Sol sebepti sońǵy kezdesýde olar da namysqa tyrysyp, jeńiske jetip jatsa oǵan eshkim tańǵala qoımas.
Saýd Arabııasynyń bas bapkeri Hýan Antonıo Pıtstsı Reseımen ótken kezdesý ózderi úshin óte aýyr soqqanyn aıtady. «Alǵashqy oıyn biz úshin óte soqqy boldy. Es jınaı almaı qaldyq. Soǵan qaramastan biz óz jolymyzben júrip kele jatqanymyzdy ańǵaryp otyrmyz. Shákirtterim aldaǵy ýaqytta talaı bıikti baǵyndyrýǵa qol jetkize alady degen senimdemin», - dedi ol.
Atalmysh oıyn Volgograd qalasynda ótedi. Kezdesý «Qazsport» telearnasynan 20.00-de tikeleı efırden kórsetiledi. Sondaı-aq, búgin A tobynda Reseı men Ýrýgvaı («Qazaqstan».20.00) quramalary kezdesedi. Al V tobynda Iran men Portýgalııa («Qazaqstan». 00.00), Ispanııa men Marokko («Qazsport». 00.00) quramalary sheberlik baıqasady.
