ÁCh-2018: Danııa quramasy Avstralııamen teń tústi

Budan buryn habarlaǵanymyzdaı, Danııa men Avstralııa úsh márte kezdesken eken. Ázirge Eýropa qurlyǵynyń ókilderi eki márte jeńip, bir márte jeńilgen. Qos qurama teń túsip kórmegen. Mamandar Danııa quramasy jaıynda oń baǵa beredi. Olar fýtboldy júıeli oınaıtynyn aıtady. Danııa fýtbolshylary negizinen qurama juldyzy Krıstıan Erıksenge kóbirek senedi.

Avstralııa jaıly mamandar pikiri bylaısha órbıdi: «Ázirge olar jaıynda úlken maqtaý aıtý erterek. Ardager Tım Keıhıl eýropalyq orta deńgeıdedegi klýbtarda dop tebetin izbasarlaryn jeńiske jeteleı ala ma? Qazir mamandardy osy suraq tolǵandyryp otyr. Jasyl qurlyq ókilderi irikteý kezeńinen áreń ótti. Toptyq kezeńde úshinshi oryn aldy. Ózi sekildi kelesi topta úshtikke ilikken Sırııamen jalǵyz joldamaǵa talasty. Eki kezdesý barysynda jeńis golyn sońǵy mınýttarda soǵyp, Reseıge bet túzegen quramalar qataryna qosyldy. Qazir Avstralııaǵa belgili bapker Bert Van Marveık bapkerlik jasaıdy. Ol 8 jyl buryn Gollandııany álem birinshiliginiń fınaldyq kezeńine deıin alyp bardy. Sondyqtan Avstralııa jaıynda ázirge tolyq sheshim shyǵarý durys emes».

Reseıdegi dop dodasynyń alǵashqy týrynda jasyl qurlyqtan kelgen fýtbolshylar Frantsııadan ońaı jeńile qoıǵan joq. Esep 1:2.

Sol sebepti olar Danııamen oıynǵa bar kúshin salatyny aıdan-anyq edi. Esesine dat fýtbolshylary alǵashqy týrda Perýdi 1:0 esebimen súrindirdi.

Sondyqtan olar ekinshi kezdesýinde jeńiske jetip jatqan jaǵdaıda jarystyń kelesi satysyna beriletin joldama taǵdyryn bir týr buryn-aq sheship qoıatyn edi.

Qos quramanyń kezdesýi danııalyqtardyń shabýylymen bastaldy. Alǵashqy úsh mınýttyń ózinde olar eki márte qarsylastar qaqpashysyn mazalap úlgerdi. Gol da kóp uzamaı soǵyldy. Oıynnyń 7-mınýtynda Danııanyń jartylaı qorǵaýshysy Nıkolaı Iorgensen áriptesi Krıstıan Erıksenge ádemi pas berdi. Ony Erıksen qaqpaǵa baǵyttap, óz quramasynyń bul oıyndaǵy alǵashqy golyn soǵyp úlgerdi. Esep 1:0.

Budan keıin de birneshe qaýipti sátter boldy. Avstralııalyqtar 35-mınýtta jaýap dobyn soǵý múmkindigine ıe boldy. Danııa qaqpasy mańynda ıÝssýf Poýlsenniń qolyna dop tıip ketti. Ispanııalyq bas tóreshi Mateý Laos bul sátte VAR ádisin qoldanyp, beınebaqylaýǵa júgindi. Sodan keıin sheshim qabyldap, Danııa qaqpasyna penaltı belgiledi. Ony avstralııalyq Maıl Edınak múlt jibergen joq. Esep 1:1.

Ekinshi kezeńde de qos quramanyń esepti ulǵaıtý múmkindikteri boldy. Degenmen olar eshqaısysyna óz jemisin bergen joq. Oıyn 1:1 eebimen teń aıaqtaldy.

Sondaı-aq, búgin bul topta Frantsııa - Perý («Qazaqstan». 21.00) quramalary kezdesedi. Al D tobynda Argentına men Horvatııa  («Qazaqstan». 00.00) sheberlik baıqasady.

Ádiljan Úmbet