ÁCh-2018: Búgin Kosta Rıka men Serbııa kúsh synasady
ASTANA. QazAqparat - Fýtboldan 2018 jylǵy Álem chempıonatynyń onynshy oıyny Samaradaǵy «Samara Arena» stadıonynda ótedi. Onda E tobynyń ókilderi Kosta Rıka jáne Serbııa quramalary ózara myqtyny anyqtaıdy, dep habarlaıdy QazAqparat tilshisi.
Bul eki qurama buǵan deıin áli kezdesip kórgen emes. Sol úshin aldaǵy kezdesýde naqty bir komandaǵa basymdyq bererlikteı dáneńe joq. Degenmen, FIFA reıtıngindegi ornyna qarap Kosta Rıkanyń deńgeıi joǵaryraq dep oılaýǵa bolady. Chempıonat aldyndaǵy upaılar boıynsha Latyn Amerıkasynyń ókili 23-oryndy ıelenip tur, al serbter ázirge 751 upaımen 34-oryndy qanaǵan tutyp keledi.
Osy orynda reıtıng ataýlynyń meılinshe shartty uǵym ekenin eske túsireıik. Dál osy Kosta Rıka 2014 jylǵy Álem chempıonatyna 28-orynmen baryp, týrnırden soń 12 satyǵa bir-aq kóterilgen bolatyn. Sol chempıonatta Italııa, Anglııa, Ýrýgvaı quramalary bar D tobynda (sol topty mamandar Kosta Rıka úshin ólim toby degen) 7 upaımen birinshi oryn alyp shyqqan. 1/8 fınalda Grekııany kedergi kórmeı, shırek fınalǵa deıin baryp jurtty bir shýlatqan. Sol kezeńde Horhe Lýıs Pınto shákirtterin azýly Nıderlandy quramasy penaltıler serııasynda áreń toqtatqan.
Qazirgi Kosta Rıka - sol Kosta Rıka. Qaqpasyn, sol baıaǵysha, «Real Madrıdtiń» negizgi kıperi Keılor Navas qorǵaıdy. Qorǵanys shebinde Djonnı Akosta, Djankarlo Gonsales, Oskar Dýarte, Krıstıan Gamboa, Fransısko Kalvo Kendall Ýoston, Braıan Ovedo sekildi úlken matchtarda ysylǵan oıynshylary bar. «Sportıngten» shaqyrylǵan kapıtan Braıan Rýıs bastaǵan jartylaı qorǵanys Selso Borhes («Deportıvo»), Krıstıan Bolanos, Danıel Kolındres, Rendall Asofeıra (ishki chempıonat ókilderi), Rodnı Ýollas, Eltsın Teheda jáne Davıd Gýsmandardan quralǵan. Al ótkir shabýyl ótinde Ispanııa chempıonatynda tájirıbe jınaqtap júrgen Hoel Kempbell bar. Onyń qabatynda Iohan Vanegas pen Markos Ýrenıa bar.
Jalpy, KONKAKAF aımaǵynan joldama alǵan qurama túbirli ózgeristerge boı aldyrǵan joq. Tipti qazirgi bapkeri Oskar Ramırestiń ózi de 2014 jyly assıstent bolǵan, 2015 jyldan beri osy quramany jattyqtyryp keledi. Qoryta aıtqanda, qazirgi Kosta Rıka kez kelgen alpaýyttyń azýynda ketetin komanda emes.
Osyndaı jınaqy quramaǵa qarsy Serbııa Eýropada júrip tájirıbe arttyrǵan birneshe fýtbolshymen kelgen. Komanda kapıtany Aleksandr Kolarov («Roma») pen Branıslav Ivanovıchti, Antonıo Rýkavına («Vılıarreal») men «Manchester ıÝnaıtedtegi» Nemanıa Matıchti bilmeıtin fýtbol jankúıeri joq shyǵar. Mılınkovıch-Savıch («Latsıo», Italııa), Aleksandr Mıtrovıch («Fýlhem», Anglııa) sekildi jas fýtbolshylar da - on eki jyldan beri jeke qurama bolyp otyrǵan serbterdiń úkilep otyrǵan úmiti.
Komandany byltyrdan beri, ıÝpp Haınkestiń pikirinshe, «jeńimpaz mentalıtet» ıesi, 44 jastaǵy Mladen Krstaıch jattyqtyryp keledi. Krstaıch E tobynda Brazılııa men Shveıtsarııaǵa qarsy oıyndarda tolyq 3 upaıdan alý qıynnyń qıyny ekenin jaqsy túsinedi. Sol úshin Serbııa Kosta Rıkadan qaıtse de úsh upaı enshileýi tıis. Sondyqtan, chempıonat aldyndaǵy daıyndyq aıasynda Latyn Amerıkasynyń ókilderimen joldastyq kezdesý ótkizdi. Maýsym aıynyń basynda Chılıden 0:1 esebimen utylǵanmen, artynsha, Bolıvııany talqandap ketti (5:1).
E tobynyń aıqyn favorıti Brazılııa quramasy ekendigi qupııa emes. Sol úshin búginnen bastap pleı-offqa shyǵýǵa quqyq beretin ekinshi oryn úshin ymyrasyz kúres júredi. Oǵan kim kóbirek laıyq degen suraqqa birneshe saǵattan soń Qazsport arnasyndaǵy tikeleı efırde mardymdy jaýap alamyz. Oıyn Astana ýaqytymen 18:00-de bastalady. Qalǵan oıyndardyń tolyq kestesin myna jerden kórýge bolady.
