ÁCh-2018: Brazılııany jeńgen Belgııa Frantsııadan óte ala ma
ASTANA. QazAqparat - Búgin túnde Sankt-Peterbýrgta Frantsııa men Belgııa quramalary fınaldyń joldamasyn sarapqa salady, dep habarlaıdy QazAqparat tilshisi.
Qos el kórshiles bolǵandyqtan, ejelden bir-birimen mıdaı aralasyp ketken. Fýtbol maıdanynda da Frantsııa men Belgııa ábden syralǵy komandalar deýge bolady. Olar bir-birimen 77 márte kezdesip, sonyń 31-inde belgııalyqtar, 26-synda frantsýzdar jeńiske jetip, 20 oıyn teń aıaqtalǵan. Degenmen dúnıejúzilik dodanyń sheshýshi kezdesýi úshin ótetin sońǵy aıqastyń bási bárinen joǵary ekeni haq.
Ýrýgvaılyq Andres Kýnıa bastaǵan tóreshiler qazylyq etetin matchqa Dıde Deshamnyń shákirtteri jaqsy kóńil-kúımen keldi. Toptyq básekede onsha qınalmaı, pleı-ofqa kúshin únemdegen frantsýzdar Messı bastaǵan Argentınany, sodan keıin Ýrýgvaıdy joldan taıdyrdy. Tek argentınalyqtardan úsh gol ótkizip alǵany komanda jankúıerlerin alańdatady. 1998 jyly álem chempıony atanyp, 2006 jyly fınalda ıtalııalyqtarǵa ese jiberip, kúmis júldeger atanǵan frantsýzdar sol tabystaryn qaıtalaýǵa bir taban jaqyn tur. Argentınamen shaıqasta qos gol soǵyp, esimin fýtbol tarıhyna jazǵan 19 jasar Kılıan Mbappe, sondaı-aq Antýan Grızmann, Olıve Jırý sııaqty oıynshylarǵa baryn salatyn sát týdy.
Roberto Martınes jattyqtyratyn belgııalyqtar birinshilik barysynda favorıtterdiń biri ekendigin tanyta bildi. Óz tobynda barlyq kezdesýinde qarsylastarynan basymdyq tanytqan «qyzyl saıtandar» pleı-off básekesinde shabýyldy tez uıymdastyratyn ushqyr komanda ekendigin kórsetti. Japonııadan 0:2 esebimen utylyp jatyp, jeńisti julyp alǵany - osyǵan dálel. Al shırek fınalda týrnırdiń bas favorıti Brazılııadan aılasyn asyryp ketti. Bul matchta belgııalyqtardyń qarsy shabýyldaǵy kúshtiligi óz aldyna, qorǵanysta da barynsha myǵym ekendigi kórindi. Bıylǵy bes oıynynda 14 gol soqqan Belgııa quramasyndaǵy Eden Azar, Kevın De Brıýıne, Romelý Lýkaký syndy jasyndaı jarqyldaıtyn fýtbolshylardyń kez kelgen qorǵanysty buzyp ótýge shamalary jetedi.
Aldaǵy kezdesýde Frantsııa sapynda pálendeı ózgeris bola qoımas. Eki eskertý alyp, aıybyn ótegen qorǵaýshy Blez Matıýıdı ǵana qaıtadan alańǵa shyǵady (Ýrýgvaımen matchta ony Korenten Tolısso almastyrǵan bolatyn). Aldyn ala málimet boıynsha Frantsııa quramasy mynadaı bolmaq: (4-2-3-1): Lorıs - Ernandes, Ýmtıtı, Varan, Pavar - Kante, Pogba - Matıýıdı, Grızmann, Mbappe - Jırý.
Belgııa quramasynda eskertý qaǵazynyń kóptiginen Toma Mene oınaı almaıdy, ony, sirá, Naser Shadlı aýystyratyn shyǵar: (3-4-3): Kýrtýa - Vertongen, Kompanı, Alderveıreld - Karrasko, Fellaını, Vıtsel, Shadlı - Azar, Lýkaký, De Brıýıne.
Aıta keteıik, 11 shilde kúni Máskeýde Horvatııa - Anglııa quramalary alańǵa shyǵady. Eger Belgııa men Anglııa utsa, G tobynan shyqqan qos komanda fınalda qaıta jolyǵysady.
