ÁCh-2018: Brazılııa sońǵy mınýtta soǵylǵan eki goldyń arqasynda jeńdi

Qos qurama buǵan deıin 11 márte kezdesti. Bul oıyndardyń 9-y brazılııalyq quramanyń jeńisimen aıaqtaldy, 2-de kosta-rıkalyqtar basym tústi. Alǵashqy kezdesý 1956 jyly 13 naýryzda ótti. Pan amerıkan oıyndarynda kezdesken qos qurama jekpe-jeginde brazılııalyqtar qarsylastaryn tas-talqan etip utty. Esep 7:1. 1960 jyly Kosta-Rıka ese qaıtardy. Tórt jyldan keıin atalmysh básekede joly túıisken qos qurama básekesinde Soltústik Amerıka qurlyǵynyń ókilderi 3:0 esebimen jeńdi. Olar 1995 jyly Ońtústik Koreıada ótken Koreı kýbogynda da atalmysh qarsylasyn 2:0 esebimen tize búktirdi. Qalǵan kezdesýdiń barlyǵy Brazılııa quramasynyń jeńisimen aıaqtaldy.

Jalpy, álem birinshiliginiń fınaldyq kezeńinde qos qurama budan buryn eki márte kezdesken. 1990 jyly Italııanyń Týrın qalasyndaǵy jasyl alań tórindegi tartysta Brazılııa Kosta-Rıkany 1:0 esebimen jeńdi. Al 2002 jyly Ońtústik Koreıanyń Sývon qalasyndaǵy stadıonda sheberlik baıqasqan quramalar arasynda Brazılııanyń mereıi ústem boldy. Onda álemniń 5 dúrkin chempıondary 4:2 esebimen jeńgen edi. Brazılııa Kosta-Rıka qaqpasyna 32 dop soqsa, qostarıkalyqtar oǵan 11 doppen jaýap qaıyrdy.

Brazılııa bıylǵy birinshilikti sátti bastady dep aıta almaımyz. Alǵashqy týrda Shveıtsarııamen 1:1 esebimen teń oınady. Sondyqtan olar burynnan syralǵy qarsylasy - Kosta-Rıkamen kezdesýde jeńiske jetýge bekinip shyqty. Biz budan buryn «Brazılııa Argentınanyń kebin kıe me» degen oıymyzdy bildirgen edik.

Pentakampeondar bul joly jeńiske jete almasa, jarysty jalǵastyrýy qıyndaı túsedi. Óıtkeni, 21 maýsymda ótken Argentına men Horvatııa kezdesýinde Messı jáne onyń komandasy qarsylasynan 0:3 esebimen jeńilip, týrnır kestesindegi jaǵdaıyn qıyndatyp alǵan edi.

Birinshi kezeńde Brazılııa tolassyz shabýylǵa arqa súıedi. Qurama sapyndaǵy juldyzdar oń qanattan da, sol qanattan da Kosta-Rıka qaqpasyna qaýipti sátter tóndirdi. Alǵashqy kezeńde dopqa ıelik etý jóninen Brazılııanyń kórsetkishi 64 % boldy. Qaqpaǵa 7 márte týra soqqy baǵyttady. Bul jóninen Kosta-Rıkanyń kórsetkishi tómen boldy. Olar negizinen qarsylastyń qurama shabýylyna toıtarys berip otyrdy.

Ekinshi kezeń de dál osylaı órbidi. Brazılııalyqtar shabýylǵa kostarıkalyqtar qorǵanysqa kóńil bóldi. Brazılııa shabýylshysy Neımar qarsylas qurama qaqpasy aldynda Kosta-Rıka qorǵaýshysy shalyp jyqty degen jeleýmen qulady. Bul sátti tóreshi VAR ádisi arqyly anyqtaýǵa tyrysty. Degenmen beıneqaıtalaýdan keıin penaltı belgilenbeıtin boldy. Toqsan mınýt túgesilip, tóreshi qosymsha 6 mınýt qosty. Brazılııalyqtar kóp kútken gol da soǵyldy. Bul 91-mınýt bolatyn. Ony Koýtıno qaqpaǵa soqty. Al 96-mınýtta Neımar ekinshi goldy soǵyp, óz jankúıerlerine qýanysh syılady. Esep 2:0.

Brazılııa jeńiske jetti. Taǵy bir sensatsııa osylaısha oryn alǵan joq. Búgin taǵy da eki oıyn bolady. E tobynda Serbııa men Shveıtsarııa quramalary («Qazaqstan». 00.00) kezdesedi. Al D tobynda Nıgerııa men Islandııa («Qazaqstan». 21.00) ózara sheberlik baıqasady.

Bul toptaǵy kelesi týr oıyndary 27 maýsymda ótedi. Sol kúni Serbııa men Brazılııa, Islandııa men Kosta-Rıka kezdesedi.

Foto: ru.fifa.com