ÁCh-2018: Brazılııa Meksıkany jeńip, shırek fınalǵa shyqty
ASTANA. QazAqparat - Búgin Reseı jasyl alańdarynda ótip jatqan 2018 jylǵy Álem chempıonatynyń 1/8 fınaly aıasynda Samaranyń «Samara Arena» stadıonynda Brazılııa jáne Meksıka quramalary kezdesti, dep habarlaıdy QazAqparat tilshisi.
Bes ret álem chempıony atanǵan Brazılııa quramasy osy oıynnyń favorıti sanalǵan edi. Biraq olar oıyn basynda 20 mınýttaı meksıkalyqtardyń shabýylynan kóz asha almaı qoıdy. Biraq ústi-ústine qaptatqan shabýyldardan nátıje shyǵa qoıǵan joq. Esesine endi Brazılııa es jıyp, oıyn tizginin qolǵa aldy. 25 jáne 33-mınýttarda «pentakampeondar» eki ret qaýipti soqqy baǵyttaı aldy. Olardy meksıkalyqtardyń qaqpashysy Gılermo Ochoa qaıtardy. Birinshi taımda komandalardyń gol soǵatyndaı basqa múmkindigi bolǵan joq.
Ekinshi taım tolyq brazılııalyqtardyń ústemdigimen ótti. Úzilisten keıin jankúıerler múldem basqa Brazılııany kórdi. Kúsh jınap kelgen qalyń qol sııaqty josparly shabýylǵa shyqty. Onyń nátıjesi de kóp kúttire qoıǵan joq. 51-mınýtta Neımar qaýipti shabýyl uıymdastyrdy. Ol aıyp alańynyń tý syrtynda aınalshyqtap júrip dopty Vıllıanǵa qaldyrdy da, ózi qorǵaýshylardyń shebinen sytyla berip, qaqpashynyń alańqaıyna qaraı júgirdi. Bul kezde Vıllıan aıyp alańynyń oń jaq shetinen jaryp kirip, qaqpanyń túbine qaraı jerletip pas berip úlgergen. Dop týra aıaǵyna kelip túsken Neımar ashyq qaqpaǵa toǵyta saldy - 1:0.
Meksıkalyqtar esepti teńestirýge qanshalyqty umtylsa da, buǵan kúshi jetpedi. Qaıta, 89-mınýtta qarsy shabýyl kezinde Brazılııa ekinshi golyn da soqty. Oń qanattan jyldam shabýyldaǵan Neımar ótkir shabýyl ótindegi Fırmınoǵa dál pas berdi. Týra birinshi goldaǵy sııaqty bul joly da brazılııalyq shabýylshylar ashyq qaqpaǵa gol soǵýdan múlt ketken joq. Roberto Fırmınonyń osy gol shırek fınal máselesine is júzinde núkte qoıdy.
Endi Brazılııa quramasy shırek fınalda Belgııa jáne Japonııa komandalary arasyndaǵy oıynnyń jeńimpazyn kútedi.
Foto: ru.fifa.com
