ÁCh-2018: Brazılııa quramasy engen topta Serbııa kósh bastady
ASTANA. QazAqparat - Fýtboldan 2018 jylǵy Álem chempıonatynda E tobynyń alǵashqy týr oıyndaryn Kosta Rıka jáne Serbııa quramalary bastap berdi, dep xabarlaıdy QazAqparat tilshisi.
Kúshteri shamalas bolǵandyqtan, teń kúres bolatyny o bastan belgili edi. Sáıkesinshe, gol soǵý da ońaı bolǵan joq. Jankúıerler osy oıynda gol kórýi úshin 56-mınýtqa deıin kútýge májbúr boldy. Kosta Rıka sapynda Davıd Gýsman aıyp alańynyń syrtynda ereje buzdy. Aleksandr Kolarov aıyp dobynan keremet gol soǵyp, Serbııany alǵa bastady.
Jiberilgen goldan soń Oskar Ramıres shákirtteri shabýylǵa bar kúshin saldy. Oıyn sapasyn arttyrý úshin Ramıres oıynshylardy almastyra bastady. Aldymen Iohan Venegastyń ornyna Krıstıan Bolanosty, artynsha Markos Ýrenıanyń ornyna Hoel Kempbelldi shyǵardy. Bul ózgerister nátıje bere qoımady. Davıd Gýsmannyń ornyna Danıel Kolındresti shyǵardy. Biraq eseptegi ózgeristiń aýyly alys edi.
Serbııalyqtar oıyndy baqylaýda ustap, shabýylǵa ara-tura umtylyp otyrdy. 87-mınýtta Aleksandr Mıtrovıch óte qolaıly sátke ıe boldy. Biraq qaqpaǵa pármendi soqqy baǵyttaýyna qorǵaýshylar kedergi jasap úlgerdi.
Tóreshi oıynnyń negizgi ýaqytyna 5 mınýt qosyp berdi. Biraq endi gol soǵylýyna bul jetkiliksiz boldy. Serbııa 1:0 esebimen jeńiske jetip, E tobynda úsh upaımen kósh bastady.
Eske sala keteıik, toptaǵy ekinshi oıynda Brazılııa men Shveıtsarııa ózara myqtyny anyqtaıdy.
