ÁCh-2018: Belgııa tuńǵysh ret júldegerler qatarynan kórindi
ASTANA. QazAqparat - Búgin, 14 shildede fýtboldan 2018 jylǵy álem birinshiliginiń qola júldegeri anyqtaldy. Bul qurmetti ataq Belgııa quramasyna buıyrdy. Belgııalyqtar Anglııany 2:0 esebimen tize búktirdi, dep habarlaıdy QazAqparat tilshisi.
Anglııa men Belgııa quramalary Sankt-Peterbýrg qalasynda qalamen attas stadıonda qola júldeni sarapqa saldy. Jankúıerler qos quramany da fınalǵa shyǵýǵa laıyq sanaǵan edi. Rasynda, bul dop dodasynda olar táp-táýir oıyn órnegin kórsetti. Dese de jartylaı fınalda qarsylastaryna ese jiberip qoıdy. Anglııa Horvatııadan jeńilse, Belgııanyń Frantsııaǵa tisi batqan joq. Bul jaıynda «Qola júlde kimge buıyrady» degen saraptamamyzda aıtqan edik.
Kóp jaǵdaıda 3-oryn úshin saıysty jubanysh oıyny dep ataıdy. Aqtyq saıysqa shyǵa almaı qalǵan quramalar dop dodasynan qur qol qaıtýdy qalamaı, osy oıynǵa baryn salyp jatady. Tarıhqa kóz salyp qarasaq, eki qurama da buǵan deıin qola júldege qol sozyp kórgen joq eken. Anglııa 1966 jyly altynnan alqa taqqanymen, budan basqa álem birinshiliginde kúmis nemese qola júldege qol sozbaǵan. Belgııa quramynda qaı kezde de úzdikter oıyn kórsetkenimen, qazirgi kúnge deıin birde-bir márte úzdik úshtikte bolý baqyty olardyń mańdaıyna jazylmaı keledi. Tek 1986 jyly tórtinshi oryn alǵan edi.
Belgııa sol olqylyqtardyń ornyn osy joly toltyryp qaıtqandy durys kórgen sekildi. Irandyq tóreshi Alıreza Faganıdiń ysqyryǵy estilisimen belgııalyqtar aǵylshyndar qaqpasyna lap qoıdy. Osyndaı sátterdiń birinde alǵashqy gol da soǵylyp úlgerdi. Belgııa qaqpashysy Tıbo Kýrtýa óz qaqpasy aýmaǵynan alańnyń orta shebinde júrgen Naser Shadlıge pas tastady. Ol da aǵylshyndar qaqpasy mańyndaǵy Toma Menege baǵyttady. Mene ony golǵa aınaldyryp, óz quramasyn alǵa shyǵaryp úlgerdi. Budan keıin qos quramanyń da esepti ózgertýge múmkindigi az bolǵan joq edi. Degenmen birinshi kezeń 1:0 esebimen aıaqtaldy.
Ekinshi kezeńde aǵylshyndar tarazy basyn teńestirýge umtyldy. Qarsylastar qaqpasy mańynda birneshe qaýipti sátti uıymdastyrdy. Osyndaı qolaıly sáttiń birin bıylǵy birinshiliktiń eń úzdik surmergeni Garrı Keın múlt jiberip aldy. Keıbir sátterde Belgııa quramasy ýaqytty ustaýǵa nıeti bar ekenin tanytyp qoıdy. Arasynda shabýylǵa shyqqanymen, negizinen óz qaqpasy mańynda kóbirek júrdi desek te bolady. 67-mınýtta aǵylshyndar shabýyl uıymdastyrǵan edi. Ony shabýylshy Garrı Keın óz paıdasyna jarata alǵan joq. 79-mınýtta Belgııa ádemi oıyn órnegin kórsetti. Sońǵy núkteni Toma Mene qoıýy tıis bolatyn. Degenmen onyń 20 metrdeı jerden tepken dobyn Anglııa qaqpashysy Djordan Pıkford qaıtardy. Degenmen ol 82-mınýtta ózimen betpe-bet shyqqan Eden Azarǵa tosqaýyl bola almady.
Osylaısha Belgııa óz tarıhynda tuńǵysh ret júldegerler qatarynan kórinip otyr. Buǵan deıingi olardyń atalmysh dop dodasyndaǵy eń joǵary jetistigi - 1986 jylǵy álem birinshiliginde tórtinshi oryn alýy. Sondaı-aq, Belgııa Eýropa birinshiliginde 1980 jyly kúmis júldeger atanǵan edi.
Aıta keterligi, Belgııa Anglııadan toptyq kezeńde de 1:0 esebimen basym túsken edi. Belgııa men Anglııa arasynda búginge deıin 22 kezdesý ótken eken. Belgııa kóp jaǵdaıda aǵylshyndarǵa ese jiberdi. Nebári 2 kezdesýde jeńiske jetken. Alǵashqysy 1936 jyly bolǵan joldastyq kezdesý. Onda Belgııa 3:2 esebimen myqtylyǵyn tanytty. Odan keıingi jeńis bıylǵy toptyq kezeńde boldy. Al 15 oıynda aǵylshyndar jeńis toıyn toılaǵan. Sondaı-aq, 5 kezdesý teń aıaqtalǵan.
Álem birinshiligi 15 shildede máresine jetedi. Bul kúni Reseı astanasy - Máskeý tórindegi «Lýjnıkı» stadıonynda Frantsııa men Horvatııa quramalary kezdesedi. Atalmysh kezdesý «Qazaqstan» jáne «Qazsport» telearnalarynan tikeleı efırde kórsetiledi.
Foto: segodnya.ua
