ÁCh-2018: Belgııa quramasyna Týnıs qolaısyz qarsylas pa
ASTANA. QazAqparat - Fýtboldan álem birinshiliginde búgin G tobynda alǵashqy oıyn ótkiziledi. Bul joly Belgııa men Týnıs quramalary kezdesedi, dep habarlaıdy QazAqparat tilshisi.
Týnıs quramasy Belgııaǵa qolaısyz qarsylas sekildi. Aıta keterligi, eki qurama buǵan deıin 3 márte sheberlik baıqasqan. Olar bir-birden jeńiske jetse, bir oıynda teń nátıje tirkeldi. Qos quramanyń joly alǵash ret 1992 jyly túıisti. Joldastyq kezdesýde Týnıs 2:1 esebimen jeńdi. 2002 jyly Ońtústik Koreıa men Japonııada bolǵan álem birinshiliginde olar N tobynda kezdesip, oıyn 1:1 esebimen teń aıaqtaldy. Árıne, ol kezde belgııalyqtar quramynda qazirgideı juldyzdar joq edi. 2014 jyly qos qurama taǵy da joldastyq kezdesý ótkizip, belgııalyqtar 1:0 esebimen jeńiske jetti. Ekeýi de bir-biriniń qaqpasyna úsh-úshten gol soqqan. Endeshe, ázirge tarazy basy teń tur. Sondyqtan bul oıynda qos qurama da sol kórsetkishti jańartýǵa tyrysady.
Ras, búginde Belgııa quramynda juldyzdar kóp. Olar árbir kezdesýde ózderine senimdi oınaıdy. FIFP reıtınginde olardyń úzdik úshtikti túıindedi. Bul kóp jaǵdaıdy ańǵartsa kerek-ti. Dop dodasynda altynnan úmitker retinde Belgııa quramasy da aıtylady.
Alǵashqy týrda Belgııa úsh upaıdy qorjynǵa saldy. Olar Panamany 3:0 esebimen jeńip, týrnır kestesinde birinshi orynǵa shyqty. Belgııa elinen kelgen jampozdar álsiz Týnıske qandaı sheberlik kórsete alady? Ony oıyn barysynda saralaıtyn bolamyz. Týnıs alǵashqy týrda Anglııaǵa 1:2 esebimen jol berdi.
Belgııa álem birinshiligine irikteý kezeńinde táp-táýir nátıjege qol jetkizdi. Soǵan qaramastan birde-bir oıynda jeńilgen joq. Belgııa 10 kezdesýde 43 gol soqty. Sonda árbir kezdesýde ortasha eseppen alǵanda 4 doptan soqqan bolyp esepteledi. Top sońynda Grekııa, Bosnııa, Kıpr, Gıbraltar quramalaryn artta qaldyrdy.
Týnıs quramasynyń qaqpashysy Mýez Assen jaraqatyna baılanysty jarysty jalǵastyra almaıtyn boldy. Sondyqtan aldaǵy kezdesýde onyń ornyn áriptesteriniń biri basady. Belgııa quramasy sapynda mundaı problema týyndap otyrǵan joq. Týnıstikter sapynda Eýropanyń mańdaıaldy klýbtarynda oınaıtyn ftbolshylar joq. Olardyń barlyǵy derlik arab jáne afrıkalyq birinshilikterde synǵa túsedi.
Álemniń býkmekerlik keńseleri atalmysh kezdesýge óz joramalyn jasady. Árıne, olar belgııalyqtar jeńiske jetedi degen senimde.
Búgin bul kezdesý 18.00-de Máskeý qalasyndaǵy «Spartak» stadıonda ótkiziledi. Kezdesý «Qazsport» arnasynan tikeleı efırde kórsetiledi. Sondaı-aq, F tobyndaǵy Meksıka men Ońtústik Koreıa («Qazaqstan». 21.00), Germanııa men Shvetsııa («Qazaqstan». 00.00) oıyndary bolady.
