ÁCh-2018: Belgııa quramasy panamalyqtardy oısyratyp ketti
ASTANA. QazAqparat - Fýtboldan álem birinshiliginde taǵy bir oıyn máresine jetti. Reseıdiń Sochı qalasyndaǵy «Fısht» stadıonynda G tobyn boıynsha ótken Belgııa men Panama quramalary arasyndaǵy kezdesýde eýropalyqtar qarsylastaryn 3:0 esebimen oısyrata jeńdi, dep habarlaıdy QazAqparat tilshisi.
Biz budan buryn Belgııa - Panama quramalary arasyndaǵy kezdesý jaıynda az-kem baıandap ketken edik.
Ortalyq Amerıka ókilderi tosynsyı jasaı ma degen úmit te bolǵan. Degenmen Eden Azar bastaǵan belgııalyq jigitter bul joly ózderiniń tájirıbesi mol ekenin taǵy bir márte dáleldedi.
Álemdik reıtıngte úzdik úshtikti túıindep turǵan Belgııa dúbirli dop dodasynyń tabaldyryǵyn endi attaǵan Panama quramasy qaqpasyna birden-aq lap qoıdy. Tájirıbe azdyǵynan ba, Ortalyq Amerıkadan kelgen jigitter qarsylastary shabýylǵa shyqqanda abdyrap qalǵany ańǵaryldy. Bul - alǵashqy on mınýttyń ishinde baıqalǵan kórinis. Budan keıin panamalyqtar es jıǵan sekildi. Birinshilikke bekerden-beker kelmegenine jurttyń kózin jetkizý maqsatynda tyrysyp baqty. Dese de mundaı qarsylasynan belgııalyqtar onsha yǵa qoıǵan joq. Tezirek gol soǵý múmkindigin izdedi. Tipti, olar uıymdastyrǵan shabýyldar esebinen jańylysyp qalatyndaı boldyq.
Oıynnyń 6-mınýtynda belgııalyqtar Panama quramasy mańynda osyndaı sátti jankúıer nazaryna usyndy. Belgııa jampozy Eden Azar áriptesi ıAnnık Ferreıra Karráskonyń qaqpaǵa dop tebýine múmkindik jasaǵan edi. Alaıda, Karraskonyń tepken dobyn panamalyq qaqpashy Haıme Penedo qaqshyp aldy. Arada bir mınýt ótkende Ortalyq Amerıkadan kelgen qurama qaqpasy mańynda osyndaı jaǵdaı boldy. Belgııalyq Drıs Mertens óz áriptesinen gol soǵýǵa ádemi múmkindik aldy. Dop qaqpa mańdaıshasyna tıip, Haıme Penedo ony qolyna ustap aldy. 10-mınýt. Taǵy da sol Panama qaqpasynyń mańy. Sol quramanyń oıynshysy Roman Torres óz qaqpashysyna dop tastaýǵa nıettengen edi. Ony Eden Azar óz paıdasyna jaratyp kete jazdady.
Taǵy bir qaýipti sát 20-mınýtta boldy. Bul joly belgııalyq Kevın De Breıne oń qanattan qaqpaǵa dop baǵyttady. Sońǵy sátte ony panamalyq Roman Torres syrtqa shyǵaryp úlgerdi. Eki mınýt ótkende Kevın De Breıne tepken dop qaqpadan bıik ketti. Qysqasy, oıynnyń birinshi kezeńiniń basym bóliginde Eýropa qurlyǵynyń ókilderi qarsylastaryn tyqsyryp baqty. Tipti, dop negizinen Panama qaqpasy aldynda júrdi desek te bolady. Birinshi kezeńde qos qaqpadan da sańylaý tabylǵan joq. Quramalar 0:0 esebimen demalys bólmesine bettedi.
Ekinshi kezeń bastala salysymen belgııalyqtar degenine jetti. Drıs Mertenstiń oń qanattan shirene tepken doby Panama qaqpasy torynda týlap jatty. Bul 47-mınýt bolatyn.
Oıyn barysynda baıqaǵanymyz, Panama birinshilik barysynda tosynsyı jasaýǵa shamasy kele qoımaıtyn sekildi. Olaı deýimizge negiz bar. Olarda júıeli oıyn órnegi baıqala qoımaıdy. Sondyqtan olar úshin árbir kezdesýde iri eseppen jeńiliske jol bermeý basty maqsattyń birine aınalsa kerek-ti.
Belgııalyqtar 69-mınýtta esepti eseleı tústi. Kevın De Brıýıne sol qanattan qaqpanyń alys buryshyna dop asyrǵan edi. Ony óziniń áriptesi Romelo Lýkaký tıimdi paıdalandy. Gol soqty. Esep 2:0. 75-mınýtta Romelo Lýkaký dýbl jasady. Panamalyq qaqpashymen betpe-bet shyqqan ol eshbir saspastan ony qaqpa torynda týlatty. Esep 3:0.
Budan keıin Panama quramasy esepti qysqartýǵa tyrysyp baqty. Alaıda oǵan Eýropa qurlyǵynyń ókilderi jol bergen joq.
Búgin G tobynda taǵy bir kezdesý ótedi. Reseıdiń Volgograd qalasyndaǵy stadıonda Týnıs - Anglııa quramalary kezdesedi. Oıyn Astana ýaqytymen 00.00-de «Qazaqstan» ulttyq telearnasynan tikeleı efırde kórsetiledi.
Qalǵan oıyndardyń tolyq kestesin myna jerden kórýge bolady.
